Tlawm lehzualin India-in Russian tuialhthei lei dawn

On Sep 4, 2025 3 0

tuialhthei lei dawn
US-in New Delhi bungraw thawn chhuaha tariff sang tak laa a hrem mek laiin a hrem chhan ber, Russian tuialhthei chu man tlawm lehzualin a la thei dawn a, barel khat zelah $3 leh $4 inkar vela tlawmin a lei a. Bloomberg-in a tar lan dan chuan Russia-a an chhuanvawr Ural grade chu man tlawm takin September thla tawp leh October velah India-a phurh tur a ni dawn.
US-a President Donald Trump-a sorkar chuan kar hmasa atang khan India hi Ukraine indona karah Russian tuialhthei a lei avangin tariff 50% a laksak tan a. Kum 2022-a Russia-Ukraine indo a chhuah lai vel atang khan New Delhi hi Russian tuialhthei leisak hnem ber a ni a. Tunah hian hei hi Washington chuan nasa takin sawisel mah se India hian Moscow bakah Beijing a kawmngeih thar lehzual mek.
China-a Shanghai Cooperation Organisation (SCO) summit neih zawh takah Prime Minister Narendra Modi chuan Russia leh India chuan ‘inkungkaihna bik tak’ an nei tih a sawi a. Chinese President Xi Jinping-a nena an inkawmnaah pawh hmelma ni lovin thawk dun an nih zawk tur thu a sawi bawk.
White House Advisor Peter Navarro-a chuan India chet dan chu nasa takin a sawisel a, “Putin-a’n Ukraine a rûn hma khan India hian Russian tuialhthei hi a lei ngai lo va, a lei pawhin tlem chauh a ni. Tunah hian eng nge thleng ta? Russian-ten a man tlawmin an pe a, India-in a thlifim a, Europe, Africa leh Asia-ah a hralh leh a. Hei hi Russian indona khawlpui chu a ni,” a ti.
India hian Moscow atanga tuialhthei a lei avang ngawta hrem theih tur an ni bik lo tih sawiin a chhang let a, US ngei pawhin Russian tuialhthei lak luh a khap bik lo niin a sawi.
August thla tir khan a lei a chawlhsan zawk a, tunah hian Indian thlifimtuten Russian tuialhthei an lak luh chhunzawm leh mek tawh a. Urals an tih bik chu man tlawm zawkin kar hmasa khan zawrh a ni a, barrel khatah $2.50-a tlawma zawrh niin July-a $1-a an tlawmna let ai pawhin an tlawm tam.
Ural hi Russia-a an tuialhthei chhuanvawr niin an ram khawthlang lama lawngchawlhna atanga an phurh chhuah thin a ni.