LA-a National Guard sipai dahah Trump-a’n dah bawhchhia

California-a US District Court judge chuan President Donald Trump-a’n Los Angeles-a National Guard a dah lut chu dan lo a ti.
Trump-a hian an ram khawpui lianahte pawikhawihna thleng hmeh mih nan leh dan lova pem lutte dap chhuah beihpui thlaka pui turin National Guard sipaite hi tirh luha hman a tum mek laiin thutlukna hi siam a ni.
June thla khan Los Angeles-ah dan lova an rama awmte dap chhuah duh loh lantirna hmachhawn turin Trump-a hian National Guard sipaite a tir.
US District Judge Charles Breyer-a chuan Thawhlehni khan sorkar hian Posse Comitatus Act a bawhchhia tih sawiin sorkar laipui chuan tual chhung thila sipai a hman theih chin a pel tih a sawi.
Judge Breyer-a hian September 12 thleng a thutlukna hi ding tura tiin Trump-a chuan ngaihtuah tha tura a tih (appeal) ngei rin a ni.
President hian Washington DC-ah pawh National Guard sipai tam tak dah lut tawhin Chicago-ah tun karah tirh luh leh a tum bawk.
Los Angeles-a a dah luh hnuah khan Governor Gavin Newsom-a chuan sorkar laipuiin Posse Comitatus Act an bawhchhe ngei tiin a sawi nghal a ni.
Judge Breyer-a thupek hian California chauh a huam a; mahse, hmun dangah pawh Trump-a thil tum danna atan hman zui zel a nih rinna a awm mek.
Thutlukna a siamah President Trump-a hian California-a sipaite a hman danah Posse Comitatus Act a bawhchhia tih a rualin Defense Secretary Pete Hegseth pawh ‘national police force chu an chief atana president siam tumah’ a puh bawk.
White House, defense department leh justice department chuan he thutlukna chungchangah hian engmah an la sawi rih lo.
Tun hi Governor Newsom-a’n Los Angeles-a National Guard sipai dah luh a khin vawi hnihna a ni a. A hmasa zawkah khan California-a National Guard contingent thununna hnuhkir theihna tura tihna a ni.
Judge Breyer-a hian Newsom-a duh angin thutlukna a lo siam tawh a; mahse, Ninth Circuit Court of Appeals-in Trump-a duh angin thutlukna a siam ve thung.