FCAA 2023 adopt tawh sut leh turin MNF-in Special Assembly koh ngen
FCAA 2023 adopt tawh sut leh turin
MNF-in Special Assembly koh ngen
MNF National Core Committee, Political Affairs Committee leh MNF MLA-te chuan Forest (Conservation) Amendment Act 2023 adopt-na resolution sut tura Special Assembly Session koh rawtna Mizoram sawrkar hnenah thlen an rel angin Ningani khan Assembly speaker hnenah ngenna hi an thehlut.
An thu thlenah hian, Assembly Session-a FCAA 2023 adopt-na resolution kha India danpui Article 371G hmanga MNF sawrkar laia lungrual taka thutlukna lo siam tawh, thiahna tur a nih avang leh ram leh hnam tana pawi tak a nih avangin Mizoram Assembly Secretariat atanga Lok Sabha-a resolution chungchang hriattirna leh resolution copy pawh thawn rih lo turin an ngen.
FCAA 2023 chu ram leh hnam tana thil tha lo leh sawrkar laipui kuta dan hmanga Mizoram hlanna a ni, tiin, rang taka Special Assembly Session koh a, he dan adopt-na resolution hi sut leh ngei an phut tih an an thlen a ni.
MNF thuchhuak chuan, ‘Forest (Conservation) Act 1980 tihdanglam tum a nih tirh atangin MNF party chuan ngun takin a ngaihtuah a. NGO lian, environment based NGOs, kohhran aiawh bakah political party aiawh nen inrawnkhawmin, Forest (Conservation) Amendment Bill chu Parliament-a pass a nih lohnan MNF sawrkarin hma a la a, sawrkar laipuiah a duhlohna vawi duailo a thlen a ni,’ a ti.
An duh lo chunga Parliament-in a pass pawh khan, MNF sawrkar chuan FCAA 2023 hi pawm thei loin Council of Minister chuan duhlohna resolution siam rawtna a pawm a. Mizoram Assembly Session 2023 August 22-ah hnawlna leh duhlohna an pass a. Assembly Secretariat atangin Lok Sabha secretary general pawh official-a hriattir nghal niin, resolution copy thawn a ni tih a sawi bawk.
Tunhnai Assembly Session-a sawiho a nih khan MNF MLA-ten pass an duhloh thu an sawi laiin, chief minister Pu Lalduhoma’n thudik lo House hrilh nia sawiin, ‘MNF sawrkarin Assembly resolution umzui lo leh sawrkar laipuiah resolution chu thlen loah min puh a. Chief minister meuhin Assembly House-a chiang taka thudiklo a sawi khan House zahawmna a tihniamah kan ngai,’ a ti.
MNF party chu FCAA 2023 chungchangah hian a dinna ngaiah nghet takin a la ding a. He dan siamthat hmanga Mizo mipui leh Mizoram sawrkar thuneihna chhuhsakna section/ provisions dahbelh hi ram leh hnam tan him lo tih a sawi a ni.