Sawrkar hmalakna chhawrtute lawm hmel hi chakna min petu – Lalrinpuii

Sawrkar hmalakna chhawrtute
lawm hmel hi chakna min petu
– Lalrinpuii
Mipui health care leh ruang phurh man tumsak chu mipui thleng phak sawrkar hmalakna pawimawh a ni a, a chhawrtute lawm hmel chu mipui rawngbawl kawnga chakna petu a ni tih minister Lalrinpuii chuan a sawi.
YMA Tawipui South Branch-in an kum 50 tlin, Golden Jubilee an lawm a hmanpuinaah Health minister Lalrinpuii chuan, mirethei leh harsa zawkte sum sen ngai loa damdawi ina an inenkawl theihna – mipui healthcare (MUHCS) sawrkarin a ruahman leh ruang phurh scheme hnuaia chhungte ruang phurhna man tumsak an ni chu mipui thleng phak sawrkar hmalakna pawimawh tak a ni a, a chhawrtute lawm hmel chu mipui rawngbawlna kawnga chakna petu a ni tih a sawi.
Mizoram chu ruihhlo leh HIV-in a run mek a, sawrkar pawhin Hulhliap Short Stay leh programme hrang hrang kaltlanga theihtawpa hma lak a ni tih Social Welfare minister ni bawk Lalrinpuii hian a sawi bawk.
Tawipui South chu ei leh bar zawn lamah kawngpuiah a innghat thui a, khualzin veivakte tana chawlhna leh chaw eina hmun lar tak a ni thin tih a sawi a. KMMTTP kaltlanga ramdang nena insumdawn tawnna kawngpuiin a paltlang tur khua a nihna chu hmasawnna nasa zawk atan hmang theia ngaihtuahna seng turin khaw mipui a chah.