2028-a final khel turin kan inpet kai mek tawh – Lal Thanzara
2028-a final khel turin
kan inpet kai mek tawh
– Lal Thanzara
2028 inthlanpui atan final khel turin an inpet kai mek tawh a. An party-in programme a hman apianga mithar lawmluh tur an nei zel chuan a tichiang tih Congress hruaitu Lal Thanzara chuan a sawi.
Zirtawpnia MPCC Aizawl West-I Block-I a tlawhnaah Lal Thanzara chuan, Dampa bialtu MLA Pu Lalrintluanga Sailo a boral avangin inthlan that a ngai a. Inthlan neih a nih tur thu leh a hun puan a nih hma, Pu Lalrintluanga Sailo boral sarhu laia ZPM leh MNF-in candidate an puang chu thil mak, chhiat tawk chhungte leh bial mipui tawrhpuina aia palzutna a ni tih a sawi.
Dampa bial mipuiin Congress party-ah beisei an nei sang a. Hnehna an chang a nih chuan 2028 MLA inthlan atan campaign a chanve an zo tluk tihna a ni, tiin, nakum Aizawl Municipal Corporation inthlan hun atan an inpeih tawh tih a sawi bawk.
“Kan party mi tam takin sawrkarna kan chan zawh loh avangin hrehawm an ti a. Mahse enchhin sawrkar, ZPM sawrkar hian Congress party Mizoram tan a lo that zia leh Mizoram-in kan mamawh zia a rawn tifiah a, Congress party-a sawrkar lehna tur kawng pawh ZPM sawrkar hian a rawn hawng leh mek a ni,” MPCC president hian a ti.
Sum hmuhna a nih beiseiin Mizoram mipui pawmpui loh FCAA chu ZPM sawrkarin a pass a, kum 2023-a ‘dan sakei’ titu MLA khan chief minister a nih hnuah, FCAA chu ‘dan sakei lo’ a tih leh si, nia sawiin, chief minister chu nitin a ni lo lamah a u-turn thut thut a, a zui duh tan pawh zui tak tak hman a ni lo tih a sawi.
“Heng, Mizoram harsatna zawng zawng sukiang tur leh rinawm taka Mizoram hmun hrang hranga kuthnathawktuten hmathar an lak leh thuai theihnan Congress party kan inpeih tawh,” a ti.