ZPM sawrkarin a ruk a ralin FCAA pawmna turin hma la – MNF Thalai

ZPM sawrkarin a ruk a ralin
FCAA pawmna turin hma la
– MNF Thalai
ZPM sawrkawrin Assembly House-a Forest (Conservation) Amendment Act 2023 pawmna resolution pass a tumnaah a ruk a ralin verther takin ruahmanna a siam niin MNF Thalai chuan an sawi.
MNF Thalai Hqrs. thuchhuak chuan, ZPM sawrkarin FCAA pawmna resolution pass a tum thu mipuia puanzar a ni miah lote, Forest minister-in document engmah chhawpchhuak lo leh opposition MLA-te buma chawpchilh taka resolution a ‘move’ tih sawiin, ‘A ruk arala verther taka an ruahmanna kaltlangpui an tumna ni ah kan ngai a. Heti chunga MNF MLA-ten thiam leh huai taka an duh loh thu an auchhuahpui kha ropui kan ti a. Heng an thusawi hi Assembly record-ah a awm reng tawh a ni,’ a ti.
MNF sawrkarin chuan kum 2023 khan Assembly House-ah vek FCAA 2023 duh lohna resolution a lo pass tawh tih a sawi a. Pass a nih hnuah bawhzui nghal niin, kar khat ralhma – 2023 August 28-ah Lok Sabha Secretariat-ah FCAA 2023 duh lohna official resolution hi thehluh nghal a ni tih a sawi.
MNF movement hmanga sualchhuah India danpui Article 371(G) tihdal tuma Pu Lalduhoma’n MLA a nih laia ‘dan sakei’ a tih hial adopt-na atan ZPM sawrkar chu thuneihna hmangsualah MNF Thalai hian puhin, ‘MNF party-a sawrkar laia FCAA 2023 duhlohna resolution Assembly-a a lo pass kha a ropui zia mipuiin an hre thar nasa a, MNF sawrkar kalta in hnam chhannana hma an lakna hi kan fak a. MNF MLA-ten FCAA 2023 pawmna resolution an do leh MNF party-in he resolution sawihoa sut leh a nih theihnan Special Assembly Session koh an phut hi tha kan ti,’ MNF Thalai thuchhuak chuan a ti.