Sawrkar office-ah CCTV bun ni se…

Tun hnai khan Mizoram Industries & Commerce Service Association chuan an director an thawhpui theih tawh loh thu a changtu minister hnenah thlenin, August thla chhunga sawn chhuak turin an ngen a. An thawhpui theih tawh loh chhan thenkhat zinga a hmatawnga an dah chu, office chhunga CCTV bun chungchang a ni a; mimal zalenna rahbehna angah ngaiin ‘invasion of privacy’ an ti a ni.
Industries & Commerce department hnuaia thawktute leh an director inkar thil eng eng emaw kha chu tuna tarlan tum ber a ni lo va; amaherawhchu, tun thil thleng atang hian, sawrkar hnuaia department office hrim hrima CCTV dah chungchangah thuneituten ngaihtuahna thar an hman a pawimawh tawh zawk lo maw(?) a tih theih awm e.
Information Technology lama India dan ‘IT Act, 2000’ hnuaiah Privacy Rules 2011 te pawh a awm a. Sawrkar office-ah pawh hian, misual beihna laka himna (safety & security) atan CCTV hi dah a ni thin a, amaherawhchu Danpui hnuaia “Right to Privacy” bawhchhe zawnga hman erawh phal a ni lova, chungte chu — inthiarna hmun (bathroom/restroom etc.) leh office hnathawhnaa document leh data etc. lang thei tura cctv camera bun, tih te a ni. Chutih laiin thil dang, entir nan—office chhunga hna thawk lova zelthel te, thil zuar an lo luha hnathawkten an bawr luai luai lai te, hna thawk lova thildang khawih daihte lang thei tura CCTV Camera dah phal a ni lo, tih dan te hi a awm chiah lo maithei. Chuvangin, MLA te zawhna chhang hman lo khawpa office hnathawkte an buai dan te pawh hi CCTV hmanga hmuh theih tura ‘CCTV camera installation’ siam theihna hmun bik te hi kan dan siamtute hian ‘legislate’ ta mai se, tun ai hian office efficiency hi a sang daihin a rinawm.
Nikum lam khan, damdawi dawra CCTV dah vekna tur thupek kha district tina a kaihhnawih thuneituten an tichhuak a, Schedule H leh Schedule X damdawi zawrhna dawr (pharmaceautical store) zawng zawngah CCTV vuah vek tur, tih a nih kha. Dan zawm lo chu Section 223 of BNS, 2023 dan hmangin hrem theih, tih a ni bawk. Hei hi a chhan chu, damdawi zuarten daktawr lehkha tel lova hralh phal loh an hralh em tih hriat theihna tura ruahman a ni.
Chuvangin, sawrkar hnathawkten dik takin hna an thawk em tih hmuh theihna tur tawk tal hi chu sawrkar office tinah hian CCTV Camera install theihna tur hmun hi sawrkar hian ‘prescribe’ ve ta mai se, a tha phian lovang maw?