Asia Cup bultanna turu! India goal 11 zingah Siami goal khat a tel

Asia Cup bultanna turu!
India goal 11 zingah Siami goal khat a tel
Nimin khan China ram khawpui pakhat Hangzhou-a Asia khawmualpui huap hmeichhe hockey inelna lian 11th edition of the Women’s Asia Cup hockey tournament-ah India chuan si 11 fai tehrenga Thailand sawp chungin bul an tan a, vawiin tlai dar 4:30 hian an match hnihnaah defending champion Japan an su zui leh ang.
India tan hian Udita Duhan leh Beauty Dung Dung-te’n goal hnih ve ve thunin, goal khat thawhtu mi pasarih zingah Mizo nula Lalremsiami telin, minute 18-ah India goal lina a thun.
India tana hoal khungtu dangte chu – Mumtaz Khan (7th minute), Sangita Kumari (10th), Navneet Kaur (16th), Thoudam Suman Devi (49th), Sharmila Devi (57th) leh Rutaja Dadaso Pisal (60th)-te an ni.
World number nine ni mek India nulate lakah 30th ranked Thailand kha beih tham an tling lo a ni ber!
He tournament-ah hian team pariat an chhuak a, team pali ve vein pool pahniha then niin, pool pahniha a sang pahnih ve ve hian Super 4s stage an lut dawn a, Super 4s top two team-in September ni 14 khian final an khel dawn a ni.
Kum 2004 and 2017-a Women’s Asia Cup trophy chawi tawh Indian women’s hockey team hi Pool B-ah defending champion leh three-time winner ni bawk Japan bakah Thailand leh Singapore-te nen an awmho a.
Pool A lamah tournament thlengtu People’s Republic of China, three-time champion Republic of Korea, Chinese Taipei leh Malaysia an awmho ve thung.
Tuntum Asia Cup hi a pawimawh zualna chu champion team hian automatic-in Belgium leh Netherlands inthlentawm tur 2026 FIH Women’s Hockey World Cup an khel nghal thei dawn a ni.
Vawiina team khawng Japan an sut hnu, September ni 8, karleh Thawhtanni khian an final pool match-ah Singapore an khel leh ang.
India hian hliam avangin China ramah veteran goalkeeper Savita Punia leh ace drag-flicker Deepika an hruai tel thei lo a, tawnhriat ngah player pahnih tel loin Thailand an sawp phawt.