Boko Haram-in khua an rûnnaah mi 60 vel that
Boko Haram-in khua an rûnnaah mi 60 vel that
Boko Haram firfiak pawlin zankhuaa Nigeria hmarchhaka Borno State-a khua an beihnaah mi 60 chuang an that niin tual chhung thuneituten an sawi.
Zirtawpni zana helhovin an beih hi Nigeria-Cameroon inrinaa sipaite inkulhna hmun, Darul Jamal khua niin sipai panga vel thi zingah an tel.
Nigerian Air Force chuan kum eng emaw zat baihvaia an awm hnua miin an khua an haw leh hnu lawkah rûn a ni tih an hriat hnua an beih letnaah hel 30 an that tih an sawi.
Tun hnaiah Nigeria-a hmarchhak, Boko Haram-ah hian jihadist an che na thar leh hle a, an hmelma lian tak, Islamic State hnuaia West African branch nen nasa takin an inep rualin mipui beihna pawh an thlen nasa hle.
Darul Jamal khuaah hian in 20 leh bus 10 tihchhuah a ni a, bus khalhtu leh inhlawhfa mi 13 vel, khaw din thar lehna kal meka thawktute chu thah tel an ni bawk tih Reuters chuan a tar lang.
Inrinni khan Borno Governor Babagana Zulum-a chuan a tlawh a, “A lungchhiatthlak a, thla rei lo te kal taah khawtlang mipuite hi khuaa kirin an nunphung pangngai an zawm leh tan chauh a ni,” tiin AFP news agency hnenah a sawi.
“Nigerian sipai awm mek hi heng thil thleng hmet mit turin an tam tawk lo a ni,” tiin tun hnaiah buaina tamna hmuna venhim hna thawktute pui turin Forest Guards din thar a nih thu a sawi bawk.
Nigerian Air Force thupuangtu, Ehimen Ejodame-a chuan an thlithlai zuinaah ‘helho hi khua atanga hmar lama ramhnuaiah an tlan chhia’ tih a sawi.
“Vawi thum hlawhtling taka kan kahnaah mi firfiak tlanchhiate zinga 30 chuang thah hman an ni,” a ti bawk.
Nigeria hmarchhakah hian mipui beihna a thlen nasat avangin sipaiten kuminah beihpui an thlak nasa a, sipai indahin nghet taka inbun tumin hma an la mek.
April thla khan Governor Zulum-a chuan state chhung hmun thenkhatah beihna thlena hmun thenkhat an thunun leh tan hnuah Boko Haram hi an lo kir leh tih a sawi tawh.
Borno hi kum 15 chhung helho hian an tibuai tawh a, mi maktaduai hnih vel baihvaia awm phahin mi 40,000 chuang an thi tawh a. An len vanglai, kum 2015 khan Borno pum deuhthaw an thunun a, chhuhsak leh deuh vek anni thung.
Nigeria-ah hian an thenawm, Niger-in jihadist pawlte bei tura an tanhona atangin an inhnuhdawh hnuah firfiak beih kawngah hna a hautak sawt.
Boko Haram hi April, 2014-a Borno state tho, Chibok-a hmeichhe sikul naupang 270 chuang an ruk bo atang khan khawvelin a hmelhriat tan a ni.