Enchhin fuh lo sawrkar avangin hma lam hun kan thlir thup: MNF Vice President

Enchhin fuh lo sawrkar avangin hma lam hun kan thlir thup: MNF Vice President
Nimina Mizo Hnam Runa chhung inkhawma political session-ah Vanlalzawma, MNF Vice President, ex MP chuan, “Hmun hrang hranga kan boruak thlir hian, kum khat leh thlakua awrh chauh ZPM sorkar kan hrawn mekah, an thil tih dik lo leh fuh lo tam tak avang hian kum 2028 inthlan kan thlir thup tawh mai a. Sorkar hnathawk leh tlawmngai pawl hrang hrangte sorkar lakah an lungawi lova, kil tinah lungawi lo thawm hriat tur a tam hle a ni,” a ti.
MNF Vice President chuan, sorkarin ram leh hnam tan pawi lian tak tak a khawih mek avang hian enchhin tlak lohah an chhuak mek a. Hemi siam tha tur hian MNF ten hnung lam hawi lovin, kan hma lam hun atan kan inpuahchah that zel a pawimawh a. Tlawmngai pawlten FCCA 2023 duhlohna an lantir mekah pawh thahnemngai taka tel tur leh, chakna chang chho zel tura kan beih zel a pawimawh takzet a ni, tiin party mipui kalkhawmte a fuih bawk.
Dr. R. Lalthangliana, MNF Sr. Vice President, Dampa constituency MNF official candidate hnen atangin Dampa constituency tlawh report tawi ngaihthlak a ni a. Dampa bialah campaign tan tak tak a la nih loh thu sawiin, “Kan MLA ui em em Pu Lalrintluanga (L) nupui fanaute leh chhungkuate nen bial mipuite thlamuan turin kan kal a, chhungkaw program a ni ber a ni,” a ti a. Bial pum hetiang hian thlawhchhuah vek tum a ni a. MNF MLA ten Pu Lalrintluanga Sailo (L) boralsan tak bial an tlawhchhuah kha bial mipuiten an thlamuanpui hle a ni tih thu a sawi bawk.