Mizoram pumah ruihhlo veivak a tlahniam

Ruihhlo do beihpui thlak a nih hnu ah ramri ah nasa takin ruihhlo lur tur ven a ni a. Hei vang hian Mizoram pumah ruihhlo veivak a tlahniam nasa nia hriat a ni.Mizoram Police hotute sawi danin, tunhnaiah Mizoramah ruihhlo veivak a pun nasat avang leh thalai zingah ruihhlo hmansual a hluar em avangin, hemi beihletna atan hian Mizoram Police, Excise & Narcotics Department leh Central YMA tangho chuan thla 4 awh turin ruihhlo do beihpui ‘Operation Against Trafficking and Use of Drugs and Narcotics’ chu kumin September 1 atang khan an kalpui.
Ruihhlo do beihpui thlak mekah hian Myanmar ramria inkalpawhna leh ramri dep khua ngaihpawimawh hmasak a ni a. Ramri depa awm khaw 22 hi kumin August khan tlawh chhuah vek niin, khawtlang hruaitu – VC, YMA, VDP leh MHIP nen hmalak dan tur ruahman a ni.
A kaihhnawih department leh pawl hrang hrang ruahman leh thawhhona rah hmuh tur a awm tan tih Mizoram Police hotute chuan sawiin, Excise & Narcotics Department leh Central YMA tangdunin khawlaia ruihhlo ngai thenfai hna thawkin, Police leh ramri chhehvela khawtlang tlawmngai pawl hrang hrang tanghoin ramri-ah nasa takin ruihhlo lut tur vengin an thawk a, beihpuithlak a nih hnu in Mizoram pumah ruihhlo veivak a tlahniam nasa hlea hriat a ni tih an sawi.
Ramri kana mihring leh lirthei veivak pawh a tlemin nasa takin ruihhlo lo lut a tlem phah a, Excise & Narcotics Department leh CID (Crime) hnuaia Special Narcotics PS-in tualchhunga ruihhlo an man (seized) zat a tlahniam a, ruihhlo man (cost) pawh a san phah hle tih an sawi a. Champhai district-ah pawh beihpui thlak a nih atangin District Police-in tum hnih bak ruihhlo an la man loa, ramri ah mihring leh lirthei veivak a tlem avangin boruak pawh a muanawm hle tih an sawi a ni.
‘Kan ram leh hnam venhimna tura sawrkar, VC, YMA leh NGO hrang hrang tanghoin ruihhlo do beihpui a thlak mekah misual leh ruihhlo tawlh report kawngah thahnemngai taka min thawhpui a, theihtawp min chhuahpui zel turin mipui kan ngen a ni,’ an ti.