Thalai ho hnenah Consumer Right

Lallunghnema
Charity Lodge
Cont: 9862288182
Consumer Huang chhiartu zawng zawngte chibai ka buk a che u.
Mizoramah hian hei ang column hi khawi hmunah mah a awm lova, Consumer Right ziaktu dang pawh an awm lo niin ka hria a. Pu Dinpuia Serchhip Govt College-a zirtiru erawhin Mipui Chanpual tih a ziak a. A tha khawp mai. Kan thianpa Dr. J. T. Vanlalngheta Ukil thar lam hian a ziak zeuh zeuh va, thian dangte hi he lam ziak tur hian ka fuih thin a. An ziak lem hlei lo va. Mahse, thianpa Ngheta hian min ti khawhar ta lo viau mai. Ani pawh hian ziak ve zel teh se.
Tichuan, tun hnai deuh atang khan thalaite hnenah Consumer Right hi ka sawi ta fo mai. |halaite zinga hetiang sawi hi ka duh ber a ni pakhat a. |halaite hian ram leh hnam siamna kawngah mawhphurhna an nei lian hle a. |halaite chêtnaah reng reng thil engkim hi a tha lamah chuan ro tling hmasawnna a thleng thin a. Chhe lam thilah erawh ram tan chhiatna a thleng awlsam bik a ni.
Tun hnai lawka Bangladesh ram thil tawnte leh Nepal thil tawnte hi a rapthlak hle a. Hriat nuam lo tak tak thil a ni. Chuvangin Mizoramah pawh hian thalaite chetna leh tel vena chuan kawng ro a su a, ram mipuiin an that phah hle thin a ni. Consumer Movement-ah pawh Mizo thalaite hian tha han thawh ve se, nasa takin kan zia chho ngei ang, tih hi a hriat theih a ni. Mizo thalaite hi rawn pet chhuak teh u le.
Sawrkar thahnemngaihna zarah Sept. 7(Sunday) khan Baptist thalai ho nen Consumer Awareness campaign kan nei a. An Hall khat hmer hmawr an lo kal khawm a. Boruak pawh a nuam hle mai. Kei ve pawh ka inbuatsaih viau mai a. Consumer Protection Act 2019 hmangin zirtirna ka pe a.
Tute nge Consumer? tihte, Consumer Right chi hrang hrang 6-te chu ka tarlang a. Consumer-te ngaih pawimawhna hi ram changkang apiangah an uarin an lo dah pawimawh a. Heng Great Britain te, Canada te, USA te, Russia ram te, Brazil te, Sri Lanka te, Turkey-ah te hian Organisation tha tak tak a awm a.
Ram hrang hranga Consumer Organisation te hian inthlunzawmna tha tak an nei bawk a; chu chu Consumer International tih a ni a. He Consumer International hian London-ah Headquarters a neiin pawl 250 vel hetah hian an tel nghe nghe a ni.
Consumer International hian pawimawhna lian tak a nei a. Kum tina hman thin World Consumer Right Day March 15 thupui tur hi a thlang chhuak thin a ni. Khawvela President hmingthang tak hming dai thei lo, Russia sawrkar pawh vau dai hialtu J. F. Kennedy khan US Congress hmaah 4 Basic Consumer Right March 15 1962 khan a puang chhuak a ni a. Hemi Ni hriatreng nan hian Consumer Day hi March ni 15-ah hman thin a ni a. Kum 1983 atang khan khawvel hmun hrang -ah he Ni hi kan hmang ziah thin a ni.
He hunah hian Consumer khawvel a ka tawn hriat thenkhat ka sawi chhuak a. Ngaihnawm an ti viau chuan ka hria a, an sawt pui ngei turah ka ngai a ni. Ka hma lawkah hian hmun hnih khatah kohhran hrang hrang |halaite nen consumer awareness programme neih turin ruahmanna kan nei bawk a. Hetiang zela kan kal theih chuan thalai zingah consumer Movement in kua a hreuh zel ang a, Mizoramah pawh hian consumer-te dikna leh chanvo nasa zawka humhalh a, venhim a ni thei tawh ngei ang.
Tunah rih hi chuan kan thalaite chu sawi loh ram hruaitu inti tam zawk hian consumer right hi an hre lo takzet a. Harsatna a neih leh neih loh pawh an hre lo hial a ni. Heti khawpa ngawng(unheard) hi hnufual nun dik tak chu a ni. Corruption tihbo duh tak Consumer Right vei a ngai; dikna leh rinawm duh chuan Consumer Right chawisan a ngai. Consumer Right veina chhe te pawh nei lova, mipui vei hi a awm thei mahse a ‘kim lo’ kan ti a ni.
Kan thalaite hi han harh chhuak zel teh se, kan lo nghak reng e. Ni tin i thil leinaah buaina i tawk lo a nih pawhin, harsatna i nei lo a nih pawhin rawk i tawk reng tih inhria ang che. Consumer i nih angin inti huaisen la, insang mar la, i duh i sawi thei a, i duh i thlang thei a, i duh i hre thei a ni. Right i nei e. Thil hralhtu chuan leitu a mamawh, i lei loh chuan a hralh thei lo. Lei lova i awm theih laiin hralh lovin a awm thei hek lo.
Ni 9 September 2025 khan Centre For Consumer Education leh Legal Metrology Enforcement tangrual chuan Aizawl khawpui veng lian ber leh mihring tamna ber Bawngkawnah Consumer Outreach Programme kan nei a. Hetah hian mi kan kal tha hle mai a. Kan phur khawp mai. Mahse, ruah sur nasain kan programme min tibuai deuh va, duhthusamin kan che chhuak thei lova, a pawi khawp mai. Dawr eng emaw zat kan tlawh a. MRP, Expiry Date, Defective Goods, Legal Metrology Awareness kan pe a. Maximum Retailed Price an zawm that leh that loh kan enfiah naah thil pawimawh inhrilh hriat a ni a. Sumdawng engemaw, a tam zawkin MRP an lo ngaipawimawh tih hmuh a ni a. Hetih lai hian bungraw thleng chungchang sawipui an ni bawk. Expiry Date hnu lam bungrua hralh lo tur te, MRP thai chhe lo turtein kan hrilh bawk. Kawng ro su turah kan ngai a, kan hlim viau mai. Heng kan programme hmanna report te hi buatsaih nghal thin a ni a. Media lamin min phurpui a, Cable TV ah te min lo puanzarsak thin a. Kan lawm hle a ni.
Centre For Consumer Education hi a kal zel dawn a; hna a thawk reng dawn a. Legal Metrology Enforcement-te nen hma kan la ho zel dawn a ni. Dawrkai leh service provider te pawh hi consumer an ni ve thova; an bang bik lo. Mi tin consumer kan nih hi pawm thlap ila. Naupang, thalai, puitling, eng ang mi pawh consumer kan ni vek. Chuvangin kan dikna leh chanvote hi i palzut mai mai lovang u; i ngai pawimawh ang u. Consumer Right hriatna a punna hmung apiangah mipui an zalen thin a ni.