A thlengtu ram lakah Siamite an tlawm tlat!

A thlengtu ram lakah Siamite an tlawm tlat!
China rama khelh mek Women’s Asia Cup 2025 Super 4s match-ah nimin khan Lalremsiami Hmar telna India hmeichhe hockey team chu tournament thlengtu leh Paris Olympics 2024 silver medallist ni bawk China an hneh lo a, 1-4-in an tlawm hlauh mai.
India hian an Super 4s match hnuhnungberah naktuk, Inrinni hian he tournament-a champion lai Japan an su leh dawn a, final lut tawh China hmachhawn nawn leh thei turin India hian Japan hi an hneh ngei a pawimawh tawh khawp mai a, mahse, an draw pawhin final luh theihna ‘chance’ chu a la awm a, a chhawn pawh India leh Japan hi group stage-ah khan si hnih ve ve thunin an lo inhnehtawk tawh a, in-draw leh ta se match danga an dinhmunte nen teh kual tur a ni ang.
Nilaini zan khan India hian an Super 4s match hmasaberah 4-2-in South Korea an hneh a; he inkhelah hian Laremsiami chuan tun tournament-a avawi thumna’n India tan goal a khung leh a ni.
Super 4s stage-ah hian Pool A leh B atanga a sang pahnih ve ve – India, China, South Korea leh Japan-te chu an inkhelh kual vek hnuah chuta a sang pahnihte chuan Pathianni, September ni 14, 2025 hian final an khel dawn a ni.