PM Modi-a hmuahna thil lo tichhia

Inrinni-a Mizoram tlawh tur India ram prime minister Narendra Modi-a’n Aizawl atangin Lamka a pan dawn a, Lamka-a amah hmuahna thil cheite lo tichhia an awm.
Ningani zan khan Lamka vela Modi-a hmuahna thil cheite hi tute emawin an tichhia a, hmun li hmun nga velah an che nia hriat a ni. A tukah heng thil chhiate hi siamthat leh a ni.
India ram prime minister hian Aizawl atangin Lamka a pan dawn a, Lamka-a hun a hman zawhah Imphal-ah kalin hun a hmang leh ang.
An tum dan chuan Lamka-ah hian BSF camp-ah helicopter-in a tum ang a, chuta tang chuan a thusawina tur Peace Ground a pan ang.
BSF camp atanga Peace Camp a panna tur, BSF camp hnaih deuhva mi, Modi-a hmuahna atana thil an cheite chu mi tute emawin an tichhia a, he thil thlenna hmun hi Pearson, Bungmual, Phailian velah a nih thu dawn a ni. Heng lai vel hi Lamka huam chhung anga ngaih a ni.
Kawng sir lehlam lehlama puan var an zar te, flag te, pangpar te, kawngpui an cheina thil velte tihchhiat a ni a, he thil thlengah hian police te’n man an nei tih thu dawn a ni.
Prime minister hun hmanna tur Peace Ground hi Zo hnahthlakte leh Meitei intihbuai laia Zo hnahthlak nunna chante ruang an dahna hmun a ni a, vawiin thlengin kuang ruak pawh a la awm. Kuang hi dah sawn tur nge puana khuh tur tih thu-ah pawh ngaihdan a inang lo tih thu dawn a ni.
Lamka atanga thu dawn danin, Lamka mipui an phur lo a, ‘Khati khawpa kan buai lai pawhin min tlawh lo a, tuna rawn kal hian awmzia a nei lo,’ tih ngaihdan a lian hle. Amah hmuahna thil lo tihchhiat pawh hi chutiang ngaihdan nen a inzawm ang tih rinna a awm.
“Mipui an phur lo a, Peace Ground-ah mi an tam ang em tih chu hriat lawk theih a ni lo a, sorkar hnathawkte kal vek tur an ti a, sorkar thuawihin anni an kal a nih chuan mi pawh an lang thahnem thei tho mai,” Lamka-a pawl hruaitu pakhat chuan a ti.