Hulhliap chhulchhuakten kutthemthiam zir chhuak

Hulhliap Short Stay Centre atanga chhuak, assistant electrician leh aluminium fabrication training zote hnenah adviser to chief minister Dr KC Lalmalsawmzauva chuan Thawhtanni khan completion certificate a hlan.
Hulhliap Short Stay atanga tha taka chhuakte pual hian sawrkar chuan special skill development training a buatsaih a. Trade pathum – assistant electrician, aluminium fabrication leh food processing-ah training buatsaih a ni. September 6 khan food processing course zir zo mi 11 hnenah certificate hlan a lo ni tawh a; tun tumah hian assistant electrician zir zo leh aluminium fabrication zir zo hnenah certificate hi hlan an ni.
Mission Foundation Movement Skill Centre Dawrpui Vengtharah training hi kalpuiin, aluminium fabrication training turin mi 28 an inziaklut a,mi 17-in a tawp thleng an zir. Assistant electrician zir tur hian mi 34 an inziaklut a, a tawp thlenga zir mi 28 niin, an vaiin mi 45 in tha takin an zir chhuak. Certificate hi LESDE department-in a pe chhuak a ni.
Trainee-te hi special category huamchhung ami an nih avangin RPL (recognised prior learning) scheme zulzui anga kal a ni a. Skill India Mission hnuaia PMKVY 3.0 norms-a kalpuiin, theory leh practical training bakah counselling leh soft skill zirtir an ni.
Training aiawha thusawituten Hulhliap – Short Stay Centre atanga enkawlna an dawn an hlawkpui tih an sawi a. Damna tluantling an neih theihna tura enkawlna an dawn zawng zawngah lawmthu an sawi a ni.