Silai inkahsiakah Mizoram titha

Hmarchhak huap silai inkahsiaka inelna, 12th North East Shooting Championship 2025 chu kar kalta khan Aizawlah neih a ni a, Mizoram chu gold medal la tam berin pakhat a ni.
Mizoram Rifles Association-in a thlen he intihsiak hi September 13 khan khar a ni a, a kharna inkhawm hmanpuitu chief minister Lalduhoma chuan, shooting chu sports ngaihsan hlawh tak, taksa leh rilru fim tak mamawh chi, mi bikte tan a ni, tiin a sawi a. Hlawhtling taka hmarchhak bial huap inelna thlengtu Mizoram Rifles Association chungah lawmthu a sawi.
Mizoram-in Vision 2036 a kalpui mek tih sawiin, India chuan 2036 Olympic thlen a tum a, Prime minister Narendra Modi pawhin a puang tawh a. Olympic-ah hian India ram aiawh thei tur Mizo thalai tam tak neih an duh a, naupang talent nei thate zawn chhuah a, training tha pek tumin Empowering Mizoram Sports an kalpui mek a. Shooting pawh Olympic sports discipline zing ami a nih avangin talent nei, chher tlak kan neih phawt chuan EMS hnuaiah chher theih a ni, tiin sawrkarin infiammite tana hma a lakna a sawi a ni.
He championship hi National Rifles Association of India president Kalukesh Narayan Singh Deo pawhin a rawn chhim a ni.
Tun hi Mizoram-in NE Shooting Championship a thlen tum thumna a ni a, hmarchhak stata 6 leh services atangin shooter 257 an tel a, Assam atanga tel an tam ber. Aizawl hmun hrang hrangah category milin an intihsiak a, a pumpuiah Mizoram chuan gold medal 25 la in team champion a ni a, Meghalaya-in gold 24 la in pahnihna a ni.