Kirk-a kahna hmuna hrukpuan leh an mi man DNA inmil

Charlie Kirk-a thahna hmuna hrukpuan chhara mi leh a kaptu nia an rinhlelh hren mek DNA chu a inmil chiah niin FBI director-in Thawhtanni khan a sawi.
Kum 22 mi, Tyler Robinson-a chu Nilaini kal taa Utah Valley University tuala right-wing activist kaptua puha man a ni a. A kahna in chung zawlah bolt-action rifle hmuh niin a bulah screwdriver chhar a ni bawk.
“Vawiin hian silai tuam nana hman hrukpuana DNA leh screwdriver-a mi chu kan rinhlelh kan kawl mek DNA nen hian a inmil chiah tih ka sawi duh a ni,” tiin Kash Patel chuan Fox & Friends hnenah a sawi.
Robinson-a thil sual tih hi a nih dan tur angin tun karah tihfel hman a nih rin a ni a, a kah chhan tak erawh an la hre lo.
FBI director-in an mi rinhlelh chenna ina lehkha an hmuhah Kirk-a ‘dah bo’ inziahna a awm tih a sawi bawk.
Utah County Sheriff-in inmate booking sheet-a a ziah dan chuan Robinson-a hi tual that, dan palzut leh dik lo taka ralthuam cheleka puh a ni.
Pathianni khan Utah Governor Spencer Cox chuan a pain police kuta a pek, Robinson-a hian chhuitute a pui tha duh lo va, mi a kah thu pawh a la puang lo tih a sawi tawh.
Cox-a hian Robinson-a’n pindan a luahpui leh a kawppui, nihna inthlak nia hriat pawhin chhuinaah hian a pui niin a sawi bawk.
Vice President JD Vance-a chuan Thawhtannia Kirk-a podcast tihchhuah thin chu a thian leh Trump-a thawhpui thin pualin a thutsak dawn tih a sawi a, hei hi India-ah chuan Thawhtanni zan kha a ni.
Kirk-a hi Turning Point USA dintu zinga mi niin an pawl hi right-wing youth political group a ni a, online hmangin inhnial theih tak tak thilah aw a chhuah thin.
Fa pahnih nei tawh, Kirk-a hi American Comeback Tour-ah tel mekin US-a college campus hrang hrang tlawhin zirlaite nen thil sawihona hun an hmang thin a. Heta a tel lai hi kah a ni ta a ni.