Palestinian insasengna kawng hawn belh, thi 65,000 tling tawh

Palestinian insasengna kawng hawn belh, thi 65,000 tling tawh
Israeli sipaite chuan Gaza City-a Palestinian-ten chhim lam an pan theihna tur kawng dang a hawn belh a, khawpuiah hian Hamas fighter an bei mek zel bawk.
Khawpuiah hian an him nan mi sang tel an awm mek a, Israel-in Hamas laka beihpui a thlak dawn avanga chhuak tura a tihte hian an chhuahsan thei vek lo va, a kawng a hlauhawm a, a dinhmun a tha lo va, chhim lamah ei tur a tha lo va, baihvaia an awm hlen an hlau bawk.
Nilainiah khan Israeli-te beihna avangin Gaza Strip-ah mi 50 vel an thi leh bawk a, heng zinga 39 hi Gaza City-a mi an ni tih tual chhung damdawi in thuneituten an sawi.
Thi awm belh leh nan hian kum hnih chhung Israel leh Hamas indona avanga Palestinian thi hi 65,000 an tling ta a. Palestinian thuneitu leh chhanchhuah hna thawktute chuan in chim karah thi tam tak an awm dawn avangin a zat tak phei chu hei aia tam fe ni turah an ngai.
Tar lan tawh thin angin indona hi Hamas-in October 7, 2023-a Israel chhim lam beia mi 1,200 chuang an thah leh hren tura mi 251 an hruai phuba laa Israel a thawh chhuah vang a ni.
Gaza damdawi in thuneitute chuan drone hmangin naupang damdawi in beih a ni tih sawiin thi awm lo mah se damlo leh a awmpuitute chu pawna an awm a ngaih phah tih an sawi.
Israel chuan August 10-a Gaza City thunun an tum tih an puan lai khawpuia awm mi 4,00,000 (40%) bel an insaseng tawh niin a sawi a. Gaza media office chuan mi 1,90,000 velin chhim lam panin 3,50,000 velin khawpui laili leh khawthlang lam an pan tih an sawi ve thung.
Israel-in khawpui thunun tuma beihpui a thlak tan niah hmun laili bitumin tank-te pawhin khawpui laili leh khawthlang lam chu kil thum atangin an pan nghal a; mahse, an la lut rih lo.
Israeli thuneitu pakhat chuan sipaite hian civil miten chhim lam an pan fel ang a, nasa zawkin thla hnih khat an bei dawn niin a sawi.
Israel hian khawpuiah hian mi 1,00,000 vel la awm turah a ngai a, la vek tur chuan thla khat aia tam a ngai dawn a, Hamas nena inkahhai an puan erawh chuan an tawpsan thei dawn niin a sawi bawk.
Kar hmasaa Israel-in Doha-a Hamas hruaitute a beih avangin inkahhai erawh a awm mai hmel lo va, he thil thleng avang hian inbiaknaa palai ber pakhat, Qatar a lawm lo hle.
Mi tam takin he thil hi sawisel mah se Israel thawhpui, US chuan a dem lo va, Prime Minister Benjamin Netanyahu-a chuan Hamas hruaitute chu khawiah pawh an bei zel ang tih a sawi bawk.
Gaza City-a Israeli sipaiten leaflet an thlakah chuan Palestinian-ten khawpui an chhuahsan nen Salahudin Road an hawn thar leh thu leh Zirtawpni chhun lai thleng hun an nei tih an tar lang.
Gaza City hi kum 2023-a indona a chhuah tirh khan chhut chhiat nghal deuh vek ni mah se Palestinian maktaduai khat vel chu an inah an haw leh tawh hlawm a. Israel-in khawpui thunun a tum thar atang hian heng mite hi chhim lama ei tur vannaah khalh khawm a tum a ni.
UN, tanpuitu pawl leh sorkar tam takin Israel hmalakna hi demin mi tam tak baihvaia siamna a ni dawn tih an sawi.
UN Commission of Inquiry phei chuan Thawhlehni khan Israel hian Gaza a beihnaah ‘mi a suat’ tih an sawi a. Israel chuan dik lo a ti ve thung.
Israeli hian Gaza City chhak lam dai a thunun tawh a, chhimchhak, hmar leh hmarthlang tuipui kam pawh a hnaih mek zel a. Heng kil hrang hrang atang hian khawpui laili leh khawthlang lam chu tank-a pan an tum a ni.
Palestinian leh UN thuneitute chuan Gaza-ah hian chhim lama Israel-in ‘humanitarian zone’ a tih thleng pawhin him lai a awm tak tak lo tih an sawi.