Thalaiten vote ruk an titawp dawn – Gandhi

Congress hruaitu, Rahul Gandhi-a chuan zirlai leh thalaiten ‘ram danpui an chhanin mipui rorelna an hum ang a, vote ruk a tawp dawn’ tih a a sawi.
A thawh hnih nana ‘vote ruk’ tia a sawi duh lohna beihpui a thlak a tawp hnuah Gandhi-a hian Ningani tlai khan X-ah a tar lang a. Sawi zui hlawh tak turin tun hnaia India thenawm, Nepal-a thalai rualten sorkar an paih thlaknaa bultumtu ber, chhuan thar, ‘Gen Z’ an tih tawngkam a hmang.
Nepal-a mipui lungawi lohna kha sorkarin social media platform lar tak tak a khap duh lohna atanga intan niin a hnu zelah politician-te e ruk nasa nia an sawi duh lohnain a zui a. Prime Minister KP Sharma Oli-a sorkar an paih thlak hnuah a aiawh lailawk turin Nepal Supreme Court chief justice hlui, ei ruknaa fihlim tak nia an sawi, Sushila Karki-i lak luh a ni.
Gandhi-a chuan ‘vote ruk’ tia a sawi mai, vote thlaka dik lo taka thil awm nia a sawi chu BJP leh Election Commission tangrualin rorel lai, NDA hamthatna tura an tihah puhin NDA sorkar hi ei rukna tam takah an inhnamhnawih niin a puh bawk.
BJP, Election Commission leh hruaitu a bitumte chuan an puhna hi nasa taka phain tanchhan mumal awm lo tiin an sawi.
Ningani chawhma khan Gandhi-a hian Election Commission chu bei lehin kum 2023-a Karnataka assembly inthlan hma lawkin software hmangin ‘voter tam tak an paih’ niin a sawi.
PowerPoint hmanga a pho chhuahah Gandhi-a hian Aland bialah ringawt pawh hming 6,018 paih a ni tih a tar lang a. Inthlan buaipuite erawh chuan he bialah hian Congress an chak zawk tih an sawi.
“Kum 2023 khan Aland biala vote paiha min puhna chu a hlawhchham a, ECI hian a chhui turin FIR an thehlut,” tiin commission chuan a sawi.
Gandhi-a’n a puhna hrang hrang a chhannaah BJP MP Anurag Thakur-a chuan Gandhi-a kaihhruaina hnuaiah Congress hi inthlan 90%-ah an chak lo niin a sawi.
“Ni tin hrehawm tihnain a tiam a. Tanchhan mumal lo leh puhna dik lo tak siam hi Gandhi-a nunphung a ni ta mek a. Court lahin a khât tawkin a ko reng mai bawk si,” a ti.
“Gandhi-a hi a daw a ni. Vote ruk a awm niin a sawi a; mahse, a dik si lo. Congress-in vote an hmua thuneihna an chan hun a thleng a; mahse, Prime Minister Narendra Modi a lo lang a, vawi thum prime minister a ni ta a, eptute hi vawi thum an chak lo tawh a ni,” tiin BJP hruaitu, Union Minister Ramdas Athawale-a chuan a sawi.
Minister hian Gandhi-a’n vote khawih buai a awm tih a sawi hi a tak tak a nih chuan vantlang hmaa mi puh kual sek lo hian tih dan pangngaiin complaint theh lut mai se tih a sawi a. “Vote ruk hi a lo awm a nih chuan tih dan pangngaiin a complaint thei reng; mahse, a ti dawn miah lo,” a ti.