DRC-a Ebola leng vangin mi 31 thi tawh

World Health Organization (WHO) tun thla chhungin Democratic Republic of Congo-ah Ebola avangin mi 31 an thi tawh tih a sawi.
WHO Director-General Tedros Adhanom Ghebreyesus-a chuan Ningania Geneva-a thuthar lakhawmtute hnenah kum thum hnua DRC-a Ebola leng leh hmasa berah hian mi 48 dang ‘a vei tih finfiah leh rinhlelh’ an la awm bawk tih a sawi.
Africa Centers for Disease Control & Prevention chuan kar hmasa khan hri hi district pahnihah a leng tih an sawi a, tunah chuan pali a ni tawh.
Hri a leng tih hi chawlhkar hnih kal ta khan Bulape-ah finfiah a ni.
Tedros-a chuan WHO leh an thawhpuiten sorkar hmalakna tawiawmin damdawi mamawh leh hmarua ton 14 chuang an thawn tawh a, mi thiam 48 an tir tih a sawi bawk.
“Khum 18 awmna Ebola treatment centre kan din a, damlo 16 an awm mek,” a ti.
Tedros-a chuan a kaite nena inhnimhnai, rinhlelh leh hnathawktu bikah invenna pek mek a ni tih a sawi.
“Bulape-a treatment centre-ah monoclonal antibody therapy Mab114 course eng emaw zat thawn niin damlo 14 hnenah pek tawh a ni,” a ti.
Tedros-a hian hri kaite hnimhnaih mi 900 chuang an hriat tawh thu leh damdawi ina thawktuten an buaipui zui tih a sawi a. Thawhlehni khan enkawl dam hmasak ber pahnih chu an chhuak tawh tih WHO chief chuan a sawi bawk.
Ebola hi thluaka lut khawsik sang tak niin Africa-ah hian kum 1970 vela an hmuh chhuah a ni a. Ram hnuaia awm chi sa, a bikin fruit bat-in an pu darh nasa zual.
DRC-a ramngaw chhah tak, ruahtui dawng tam bawk si hi Ebola hrik pian duhna a ni a. A kaite ruh chuktuah a tina a, kawthalo, khawsik leh kal leh thin tihchhiat thlengin a thlen thei a. A dam chhuak tawhte taksaah pawh a awm zui reng thei a, kum eng emaw zat hnuah pawh a chhuak leh thei.
Kum 2014 leh 2016 inkar khan Africa khawthlang ram pathum – Guinea, Liberia leh Sierra Leone-ah Ebola hi nasa taka lengin a len nasat ber tum a ni a, mi 11,000 chuang an thi.