Aizawlah Namo Yuva Run nei

Aizawlah Namo Yuva Run nei
BJP Mizoram chuan Prime minister Narendra Modi pianchampha denchhena thalaite tana BJP hmalakna kal zelah Inrinni khan Aizawlah marathon – Namo Yuva Run an buatsaih a. Lalhmunmawia, Mualpui Salem Veng chu pakhatna a ni.
Namo Yuva Run hi Bawngkawn Traffic Point atangin tan a ni a, MLA K Hrahmo chuan a vailiam a, mi 251 an tel. Lammual thleng tlan a ni a, Lalhmunmawia – Mualpui Salem Veng chuan gold medal la in, sumfai Rs. 10000 a dawng a, pahnihna TC Lalnunsanga, Rulchawm niin, Rs. 7000 a dawng. Pathumna chu Lalkaisanga, Lawngtlai niin, Rs 5000 a dawng a; an vai hian certificate an dawng bawk. An ni bakah hian top 10-ah mi pasarih dang an lang a, consolation prize dawngin Rs. 1000 theuh pek an ni a, hmeichhia leh mipa naupang intlansiaka telte hnenah special prize pek an ni bawk.
A kharna inkhawmah BJP State president Dr K Beichhua chuan, Namo Yuva Run hi India ram puma hman tur niin, a hun dik tak chu September 21 a ni a, Pathianni a nih avangin Mizoramah chuan Inrinnia a hman a ni. Prime minister Narendra Modi-a’n thalaite a ngaipawimawh a, India ram hmalam hun atan an pawimawh tih a hriat avangin thalaite khawvelah hian thalaite hmakhua a ngai tih a sawi. “Entrepreneur-te, thalai hnathawh tur neilo tam takten hna an neih theihnan leh India rama tharchhuah tam zawk a awm theihnan an thiamna hman tangkai a, ‘Make in India’ tih thupuia hmangin India ram ropui zia khawvel hmuhah a pholang a, chuvangin Mizo thalaite pawh Mizoram hmalam hun atana pawimawh tak tak kan nih avangin kan hrisel that a ngai a, mahni taksa invawnga hrisel taka awm tura inthunun turin ka chah che u a ni,” a ti.