ASF a zia telh telhah ngai

African Swine Fever (ASF) hri a leng a, he hri hi a zia telh telhah ngaih a ni. Vawk a thi nasa lo telh telh a, hri hi a darh zui rih lo bawk.
Kuminah March ni 20-ah ASF hi Mizoramah finfiah a ni a, district pariatah finfiah a ni tawh. Finfiahna hnuhnung ber chu Aizawl district a ni a, August ni 4-ah finfiah a ni. District dangah hmuh a ni zui rih lo a, thla hnih dawn chu finfiah thar a awm ta lo.
A darh tak loh bakah hri vanga vawk thi a tam lo telh telh a, AH&Vety department lam pawhin a zia rih a, a zia telh telh tihnaah an ngai.
Kumina ASF finfiahna hmasa chu Mamit district a ni a, chumi hnuah Lawngtlai, Siaha leh Lunglei district-ahte finfiah a ni. July ni 5 thleng khan heng district pangaah chauh hian a leng a, kum hmasa lam angin district hrang hrangah a darh chum chum lo. July ni 6-ah Khawzawl district a lang a, July ni 21-ah Champhai district a lang ve leh. August thlaah Hnahthial district-ah hmuh a ni leh a, finfiah hnuhnun berna Aizawl district chu August ni 4-ah a lang tan. District pariata finfiah a nih chhung pawh hi a kar a zau a, kum dang ai chuan a nasa lovah ngaih a ni.
AH&Vety department hotute sawi danin, district danga finfiah a nih hian, finfiahna hmasaah a lo zia hman thin a, district pariatah finfiah ni mah se heng district pariatah hian a leng chum chum tihna a ni lo.
An chhinchhiah danin, September ni 22 thleng khan kuminah ASF vangin vawk 9320 a thi tawh a, vawk 3434 tihhlum/suat a ni tawh.
He hri hi district pariata khaw 160-ah finfiah a ni tawh a, a tuartu chhungkaw zat hi 3673 tiin an chhinchhiah.