Tualthihna thubuaiah rorelna dik phutin veng mipui an pungkhawm

Tualthihna thubuaiah rorelna dik
phutin veng mipui an pungkhawm
Champhai Bethel Veng chu an veng mi tualthihna thubuai kal mekah Thawhtanni khan District Court tualah an pungkhawm.
Thudawn danin, Pausianmuang (28) tualthihna thubuai kal mekah pawikhawihtua puhte chu September 22 kha Champhai District Court-a an inlan leh hun a ni a. He tualthihna an duh loh zia leh court-in pawikhawihtute hrem ngei se an duh zia lantirin Pausianmuang awmna Champhai Bethel Veng VC, YMA, MHIP leh MUP chuan thuchhuah intawm siamin, an veng mipui chu Champhai Zote-a District Court-a kalkhawm turin an inhriattir a. Hemi ang hian engemawzat an pungkhawm a, pawikhawihtua puhte hi court-a an inlan hun sawn leh a ni.
Champhai Bethel Veng mipui pungkhawm chuan, court-a inlan turte chawpchilh taka an inlan hun sawn danglam a ni chu Bethel Veng mipui zah lohnaa an ngai tih an sawi a. Pawikhawihtua puhte chu court-a inlan tura koh an nih nia an inlan loh avang hian man phutin an aurual a ni.
Champhai Bethel khawtlang hruaitute leh court thuneitute inbia in, pawikhawihtua puhte court-a an inlan leh hun tur an tifel a, kumin October 1-a koh an ni dawn. Hemi ni hian an inlan lo a nih chuan court hian man theihna thupek a chhuah dawn a ni.
Pausianmuanga (PS Muanga) thihna thubuai buaipuitu case in-charge officer chu court-a charge sheet thehluh hunah a peih fel hman loh avangin mipui lungawi lo hi kumin July 4 khan Champhai Police Station kawtah an lo pungkhawm tawh a ni.
Thudawn danin, kumin March 29 zana Chhangphut Field gallery atanga a thlang lama tla PS Muanga hi damdawi in panpui a nih hnu ah a thi a; a tlak chhan hi an sualrawn vang nia hriat a ni. PS Muanga nu hian Champhai PS-ah FIR a thehlut a, hemi ang hian he pawikhawihna inhnamhnawih nia hriat mi 8 chu man an ni a, thubuai siam a ni. Case an awrh hi bail-a chhuah leh theih a nih avangin court-in bail-in a chhuah a ni.