Ram chhunga sum vir vel tam a pawimawh

GST 2.0 chu kan hmang tan ta. Hei hi India ramin kum 100 a tlin (2047) huna ram changkang (developed country)-a inhlankai hman tuma sawrkar laipui hmalakna pakhat a ni a. Chhiah chawi a tlem chuan, chhungkaw tin inrelbawlna a zangkhai phah ang a, hmasawnna chak zawk a thleng ang a, chumi infawkkhawm chuan ram leh hnam hmasawnna nasa takin a tithang dawn, a ni awm e.
India hi khawvela economy thang chak berte zingah a tel chho mek a, khawvel sawrkar lian ber berte pawhin India hi an thlir thup tawh a ni. Hetih lai hian, India ram bung pakhat Mizoram chu India ramah rau rau pawh a chenbeh ber, a budelh ang deuh kan ni awm e. State dang economy nena khaikhin ralah chuan, Mizoram chu a mawngphah lamah kan awm; chutih laiin, standard of living lamah chuan kan sâng ru fu lawi si.
GST 2.0 hi lawmawm kan ti a ni maithei e; ni e, chhiah chawi a tlem chuan thil man pawh a tlawm ang a, chhung tin inrelbawlna pawhin hma sawn phah ngei ang. Chutih rual erawh chuan, kan sum leh paite hi keimahni state chhungah a vir kual tlem em em a, kan mamawh 50% vel hi chu state dang atanga kan chawkluh a nih a rinawm a. Chuti a nih chuan, kan state chhungah hian kan pawisa hi a cham rei lo hle tihna a ni a, state pawnah kan vawm chhuak ur ur reng mai tihna a ni awm e.
Keimahni’n kan siam chhuah ve theih loh ni tin mamawh, state pawn atanga kan chawk luhte hi chu a awm reng ang. Chutih laiin, kan state chhunga keimahni’n kan siam chhuah/thar chhuah ve theih ngei ngeiah pawh, state danga sum kan vawm chhuak hnem lutuk ber mai hi, kan changkan theih lohna, kan thanmawh bawk lianpui niin a lang.
Chuvangin, GST 2.0-ah hian lawm liam mai lo ila, eng tin nge state pawna kan sum vawm chhuahte hi kan state chhungah a tam zawk kan vir kual tir ve theih ang tih hmathlir atan Mizoram sawrkar hian, ‘Mizoram Viksit 2047’ (Mizoram Developed 2047) puang ve se a tha ang e.