Trump-a’n Palestinian tana ram din pawmtute dem

Trump-a’n Palestinian tana ram din pawmtute dem
US President Donald Trump-a chuan khawthlang ram chakten Palestinian ram an pawm ta mai chu a dem thu a sawi a, hei hi Palestinian hel pawl, Hamas-in ‘rawng taka mi an suatna’ tur kawng mai a ni tih a sawi.
United Nations General Assembly-a Thawhlehnia thu a sawiah Trump-a hian ram chakte hi kum hnih dawn liam taa indona chhuah chhan ber, Hamas-in Israel an beih ruala Gaza-a an la hren zuite himna ngaihtuah turin a ti.
France, Britain, Canada, Australia leh Portugal chuan tun ni hnih liam ta chhungin Palestinian ram hi an pawm.
Palestinian-te tana ram a din an pawm chhan ber hi Israel-in nasa taka Gaza a beihna leh mihring awmte dinhmun chhe lutuk tawh vang a ni ber a, ram pahnih a din mai chu tha an ti ta a. Hei hi Israel leh a thian tha, US chuan a duh lo hle.
“Buaina hi kan la duh reng a nih chuan he pawl (UN) hian Palestinian ram pawm dan kan dap mai a ngai ang. Chu chu Hamas firfiakte tana thil lawmawm, mi an suatna atana remchang tak a ni,” tiin Trump-a hian UN intawh khawmnaah hian a sawi a ni.
“Hamas-te thil duh pe mai lovin, muanna duhtu chuan thu chah inang kengin, tunah mi hrente chhuah nghal kan duh,” a ti.
Trump-a hian Thawhlehni vek khan Muslim tamna ram – Saudi Arabia, UAE, Qatar, Egypt, Jordan, Turkey, Indonesia leh Pakistan aiawhte chu Gaza chungchang a sawipui bawk a. Hei hi India-a Nilaini zing lam kha a ni tawh.
Israel hi ram tam takin Gaza-a sipai chakna hmanga a chet dan an dem a, Palestinian 65,000 chuang thi an awm tawh a ni.
Tun hnaiah Prime Minister Benjamin Netanyahu-a sorkar chuan nasa zawka Gaza City khawpui chhut an tum thu sawiin hei hi an kalpui mek bawk.
US leh Israel hian Thawhtannia France leh Saudi Arabia huaihawta New York-a khawvel ram hruaitute intawh khawm chu an boycott a, he summit hi UN-a Palestinian ram din pawm a nih theih nana ram thenkhat intawh khawmna a ni.
Palestinian ram a din hi ram tam takin pawm mah se UN member ni tur erawh chuan Security Council-in a pawm a ngai a, hetah hian US-in veto power a neih avangin a dodal tlat thei.
UN Secretary-General Antonio Guterres erawh chuan Thawhlehni zana Security Council-a thu a sawiah Palestinian-te tana ram hran a din mai hi a tha ati a. “Hei hi ram pahnih awm chhanna fel fai a ni. Israel leh Palestine ram indang, mahnia ro inrel, mipui rorelna ram siam,” a ti.
Israel leh Palestinian ram siam hi US-in a duh, 1993 Oslo Accords an tihah pawh buaina tihtawpna tura rawtna awm a ni a; mahse, a taka kalpui theih a ni lo.
Israel-a sorkar ding tawhte reng rengin Palestinian ram a awm hi an duh ngai lo va, October 7, 2023-a Hamas-in an ram beia mi 1,200 chuang an thah leh hren tura mi 251 an hruai zinga an la hren mekte chu an kuta hlan let an duh ber rih.
A nawr nan Gaza City chu laka Hamas nuai chimih tumin an thawk mek zel reng a ni.