Tui nut vangin pump lo zeuh zeuh

Aizawl tui tlan Tlawng nut thu hi thu thar pawh a ni chiah tawh lo, nikum lam atang khan a nut vanga pump loh a awm fo a, tun hnaiah pawh an pump thei lo zeuh zeuh.
PHE department-in an chhinchhiah danin, September ni 7 atanga ni 16 thleng khan tui hi ni tin chuan an pump a, mahse an pump theih ni-ah pawh hian pump theih loh lai a awm thin. Ni sarih chhung chu ni khat chhunga an pump tur zat an pump thei lo.
Ni tin an pump thei chungin ni tina an pump loh chhung hi belh khawmin darkar 48.05 a ni a, hetiang zat an pump theih loh avang hian tui litre maktaduai 11.5 an pump lo (hloh) tiin an chhut.
Thawhlehni zana ruah sur vakah pawh khan a nu a, NTU 1000 dawn dawn a ni. Tun hnaiah NTU 900 leh 1000 inkar a ni fo.
Tui fim lam tehna hi NTU (Nephelometric Turbidity unit) an ti a, PHE department hian NTU 5 hnuai lam an sem thin. Hun pangngaiah Tlawng lui hi NTU 100 hnuai a ni fo a, NTU 300 a nih chang te pawh a awm. Lui tuiah chuan NTU 300 hi a nu lovah ngaih a ni a, NTU 100 te phei chu lui fim tak a ni an ti. Chung chu an pump a, NTU 5 hnuai lam nihtir tumin an tifim thin. Amaherawhchu, tihfim rual loh khawpin tun hnaiah Tlawng lui hi a nu fo a, tihfim a hautakna lam bakah, lo pump pawh ni se khawlin a tuar thin. Chuvangin tui nu hian harsatna a thlen nasa an ti.
Nikum lam atangin Tlawng hi NTU 1000 a kai ta fo a, tunlai hian NTU 900 atanga 1000 vel a ni fo tih an sawi.
PHE department hotute chuan tuna tui tinutu ber hi lui kam vela leivung paih a nih thu an sawi a, kawng laihna leivungin a tihnut thu te, mimal leivung paihin a tihnut thu te an sawi. Leivung hi tun hnaia paih ni kher lo pawh, kum hmasa lama mi pawh ni se a la tla zo lo a, ruahin luiah a len a, chutiang chuan rei tak tak a nghawng thin an ti. Leivung ni lo bawlhhlawh dang chungchangah chuan hmasawnna a awm tih an sawi a, bawlhhlawh chi dang a tam lo telh telh nia a lan thu an sawi.