Pharmacist dik takin damdawi dawr nghakin an vil vek tur ani – Health minister
Pharmacist dik takin damdawi
dawr nghakin an vil vek tur ani
– Health minister
Danin a phut angin damdawi lam thiam, pharmacist dik tak ngeiin damdawi dawr nghakin, an hun pumin an vil tur a ni tih Health minister Lalrinpuii chuan a sawi.
Mizoram State Pharmacy Council buatsaihin Ningani khan Aizawlah World Pharmacists Day 2025 hman a ni a. Hmanpuitu Health & Family Welfare minister hian, damdawi siam dan atanga mipui hnena hralhchhuah dan thlenga thiamna bik nei an nih avangin pharmacist-te an pawimawh hle a, an tel loin healthcare system a kal thei lo tih a sawi.
Damdawi chu a nih dan tur ang taka temperature, humidity leh ni enga vawnthat an nih loh emaw, a ei hun leh ei dan dik tak inhrilh a nih loh emaw chuan a chakna leh hnathawh dan danglam theiin nunna hialin a tuar thei a, damdawi dawr reng reng danin a phut angin damdawi lam thiam, pharmacist dik takte ngeiin nghakin, an hun pumin damdawi dawr an vil vek tur a ni tih a sawi bawk.
Mipui harsatna sukiang tura sawrkar hmalakna a sawi a. Tun dinhmunah pharmacist 17 (contract), assistant director 3 leh Drugs Testing Laboratory-a thawk tur junior analyst 3 lakna tura hma lak mek a nih bakah Mizorama PHC, CHC zawng zawng leh District Hospital tinah pharmacist dah vek tura hma lak a ni tih minister hian a sawi.
“Mizoram-a cancer tam lutuk chhan zirchian tum a ni a, pharmacist-te in pawimawh hle dawn a ni,” a ti.
World Pharmacists Day hmannaah hian RIPANS director Dr Sanjay D. Sawant leh Mizoram State Pharmacy Council vice president Dr H Lalhlenmawia ten thu an sawi a. Mizoram-a pharmacy zirna college hrang hrang – RIPANS, Laithangpuii College of Pharmacy, Mizoram Institute of Pharmaceutical Sciences, Blessino Pharmacy Institute zirlaite leh pharmacist hna thawk laite an tel.
Pharmacy Act 1948 Section 42 tarlan angin, damdawi reng reng registered pharmacist-te chauh lo chuan zawrh emaw hralhchhawn emaw phal a ni loa, dan zawm lo chu Drugs & Cosmetics Act 1940 Section 18(c) leh Section 27 hmangin kum 3 thleng lung in tan leh pawisa chawi theih a ni.