Ladakh mipuiten state an duhna an lantirnaah mi pali thi

Ladakh mipuiten state an duhna an lantirnaah mi pali thi
India-a Himalayan tlangdunga awm, Ladakh UT-ah mipuiin state nihna neih phutna tual chhung mite tana hna hauhsak phutna an lantirnaa police nen innawrin mi pali an thi niin Reuters-in a tar lang.
Buddhist-Muslim tamna hmun hi kum 2019 khan Prime Minister Narendra Modi-a kaihhruai sorkar laipui chuan Jammu & Kashmir state ni thin atanga thenin New Delhi atanga awp tura union territory pahnihah a siam a, pakhat hi Jammu & Kashmir UT tih a ni.
Activist Sonam Wangchuk-a kaihhruaia thil phut lantirtute hian Ladakh hi special status peka tribal-te humhim theitu tur tual chhung awp tur mipui aiawh thlan chhuah theihna an duh tih an sawi tel.
Nilaini zan khan Indian home ministry chuan mipui thil phut hi September 10 atanga chaw ngheia nawr tawh, Wangchuk-a’n ‘a pawi zawnga mi tiphur thei’ a sawi vanga chhuak a ni tih a sawi.
Mipuite hian political party office an suasam a, Leh chief executive councillor pisa leh police lirthei an hal niin ministry thuchhuah chuan a tar lang.
Buaina chhuakah hian police leh mi dang 30 chuangin hliam an tuar niin an sawi bawk.
“Mahni an inven nan leh hnawh darh nan police hian silai an hmet puak a, vanduaithlak takin mi thenkhat thi an awm phah a ni,” an ti.
Ministry hian boruak sa zual chu ‘tlai dar 04:00-ah thunun a ni a, chawhma lamah vanduaina hi a thleng a ni,” an ti.
“Nilainia tharum thawhna thlen lai hian kan chetna avangin thalai pahnih thum thi an awm a… Ladakh mipuite hian kan thalaite thihna hi a lo thlawnin kan kaltir dawn lo tih kan sawi a… Kan thil phut a hlawhtlin hma chu kan bei zel ang,” tiin Leh Apex Body Chairman Thupstan Tswang-a chuan a sawi.
Hmun suasama hal zingah Leh-a BJP pisa pawh a tel niin news agency ANI chuan a tar lang.
ANI-in video a tihchhuahah chuan office hung chhung hnung lam atangin mei khu dum tak a chhuak a, hmun dangah pawh hetiang hi hmun tur awmin mi za rual an au dual dual lai a lang bawk.
Indian TV channel-te pawhin police lirthei kang hluah hluaha kalsante pawh an tilang a. Tual chhung chanchinbute chuan thalai thenkhatin police hi lungin an vawm a, anni hian hnawh darh nan tear gas-in an phut ve bawk tih an tar lang hlawm.
Police chuan an zinga mi 20 telin mi 50 chuangin hliam an tuar niin an sawi.
“Hei hi thalaite thinrimna, kawtthlera an lanchhuahtir tak chu a ni a… Thalaite hi hetiang tharum thawhna lam hawi hi chuan kal lo turin ka ngen a ni,” tiin Wangchuk-a chuan a sawi a, ani hian chawlhkar hnih chaw a nghei hnuah tharum thawhna a thlen hnu atangin a chaw nghei a titawp.
Ladakh Lieutenant Governor Kavinder Gupta-a chuan mipuite chu tharum thawh bansana muanna vawng zawk turin a pisa atanga video-a thuchah a sawiah a sawi.
District thuneitu, Romil Singh Donk-a chuan muanna a awm theih nan vantlang punkhawm leh mi fuih phur thei ang chi sawi khapna thupek a chhuah nghal bawk.
Ladakh hi China nena inri niin India tana hmun pawimawh tak a ni a. Home ministry chuan Ladakh-a hruaitute hi kum 2023 atanga lo dawr tawhin an thil phutte ngaihtuah pawh a tiam thar leh.
Inbiakna hi October 6-a neih chhunzawm leh tura ruahman a ni.