Kum nga tang turin French president hlui Sarkozy hrem

Kum nga tang turin French president hlui Sarkozy hrem
French president hlui, Nicolas Sarkozy-a chu Libyan hruaitu thin, Col Muammar Gaddafi-a hnen atanga dan lova euro maktaduai tel dawn theih nana thil ruahmana puhnaah thiam loh chantirin kum nga tang tura tih a ni.
Paris criminal court chuan ei ru leh dik lo taka campaign sum tuak leh thil danga puhnaah chuan thiam loh a chantir lo thung.
Sarkozy-a hian court dangah ngaihtuah tha leh turin thlen a tum a, hnehna a chang zo lo a nih chuan lung in a tan a ngai dawn a ni.
Ningania thutlukna siam a nih hnuah kum 70 mi, kum 2007-12 chhunga president, Sarkozy-a hian a thubuai chu politics thil vang nia sawiin Gaddafi hnen atanga sum a dawnte chu kum 2007 inthlana campaign nan a hmang nia puh a ni.
Sarkozy-a hian Gaddafi-a hi khawthlang ramten an ensanna laka a tlaktlum theih nan a tiam ve thung.
Judge Nathalie Gavarino chuan Sarkozy-a hian a thawhpui hnai zualte chu Libyan thuneitute chu a campaign-na tur sum a hmuh theih nan dawr phalna a pe niin a sawi a. Hetih rual hian court chuan president hlui hian dan lova campaign sum dawn a hlawkpui ngei tih finfiahna erawh an hmu lo thung.
Lung in tan bakah hian €1,00,000 chawi tura tih a ni bawk.
Thubuai hi kum 2013-a chhui tan kha a ni a, a hma kum hnihah khatih laia Libyan hruaitu fapa, Saif al-Islam-a’n Sarkozy-a hian a pa pawisa tam tak campaign nan a hmansak niin a sawi chhuak a ni.
A hnu kumah Lebanese sumdawng, France leh Middle East inkara hun rei tak indawrnaa tel, Ziad Takieddine-a chuan ziakin Sarkozy-a hi campaign hi Tripoli-in sumin an pui ngei tih a sawi zui a, president a nih hnuah pawh € maktaduai 50 an pe zui leh niin a sawi bawk.
Thubuai nei zingah hian interior minister hlui pahnih, Claude Gueant leh Brice Hortefeux te pawh an tel a. Court chuan Gueant-a hi ei ruk leh thil dangah thiuam loh a chantir a, Hortefeux-a hi dan bawhchhiatna tura thil ruahmanah thiam loh chantir a ni thung.
Sarkozy-a nupui, Italian supermodel leh zai thiam, Carla Bruni-Sarkozy-i pawh nikum khan Gaddafi-a nena an inzawmna finfiahna thuk ru leh a pasal thil dik loh tih puitua puh a ni bawk a, a pha ve ve thung.
Kum 2012-a president a chuha a tlak hnuah Sarkozy-a hi thubuai hrang hrangin a tuam zui.
February, 2024 khan kum 2012 inthlana a campaign-ah uchuak taka sum hmang leh a thum tura PR firm chhawra puhnaah thiam loh chantir a ni a. Kum khat tang tura tih niin thla ruk erawh tihkhawtlai a ni.
Kum 2021 khan kum 2014-a judge tham tuma puh a ni a, French president hlui zinga custody-a awm tura hrem hmasak ber a ni.