Cancer tam chhan zir chian….

Health minister chuan, “Mizoram-a cancer a tam chhan zirchian tum a ni a, pharmacist-te in pawimawh dawn” tiin a sawi a. Hei hi tun hnaia Mizoram State Pharmacy Council-in ‘World Pharmacists Day 2025’ an hmannaah health minister hian a sawi a ni.
Ni e, Mizorama cancer tam chhan hi eng ber nge tih chhui chian hi tihmakmawh a ni. Mihring tam dan atanga chhuta India rama cancer tamna ber kan ni a, mihring kan tlem si a, cancer vei lo tura ‘tih tur’ leh ‘tih loh tur’ kan hriat chian hi a pawimawh takzet zet a ni.
Mizoramah vaihlo leh a kaihhnawih (zuk leh hmuam etc) a hluar em em a, India rama vaihlo leh a kaihhnawih hmang uar ber state kan ni a, chutih rualin cancer tamna ber kan lo ni bawk si nen, vaihlo hi cancer thlentu ber a ni ang tih rin a harsa lo hle a. Daktawrte pawhin cancer hrang hrang vei zingah vaihlo leh a kaihhnawih hmang nasa an tam ber tih an sawi thin a, chutih laiin vaihlo khawih lo pawh cancer vei chu tam tak an awm bawk.
Cancer tam chhanah ‘vaihlo’ hian rin a kai deuh ber a; mahse, zirchianna awm si lova, rinthua vaihlo mawhpuh ngawt hi a him lo hle thei; a chhan pawh, kan ei leh in, kan life style te hi cancer thlentu a nih theihna chance a sang em em a, vaihlo ringawt kan mawhpuh laiin ‘kan ei leh in’ lam te pawh hi a lo ni daih thei bawk a, chuvangin a zira zirchian (research based) hmanga thil dik tak hriat chian hi a pawimawh takzet a ni.
Kan thenawm state-a sumdawng thenkhatin damdawi bawlhlo (chemical) hmanga thlai an sawngbawl lai video, social media-ah a darh (viral) thin a. Heng zingah hian thlai rah leh thlai hnah, a hmelhmang mawi rei tura damdawi tuia an tihuh lai te, balhla tih hmin hma nana damdawi tuia an chiah lai te, eng eng emaw hetiang lam thil video viral hi tunhma atangin hmuh tur a awm deuh reng. Mahni tharchhuaha intodelh lo tak kan lo ni bawk nen, thenawm state atanga ei leh in chawhmeh etc. kan chawkluhte pawh hi zirchian tham fe chu a ni nghal awm e.