Cess chhawr tur zingah college an tel ve hnu ah sawrkarin a paih leh

Cess chhawr tur zingah college an
tel ve hnu ah sawrkarin a paih leh
Sawrkarin cess (chhiah) a lakna hman tangkai lehna tur zingah college tihchangtlunna atan sawrkarin a tirah a dah ve a, a hnu ah a paih leh. Hei hi college zirlai intelkhawmna pawl chuan an hrethiam loa, telh leh ngei an phut a, sawrkar an nghak mek.
Aizawl City College Joint Students’ Union (ACCJSU) sawi danin, 2024 August 30-a cess lakna tur, the Mizoram Value Added Tax (Amendment) Rules 2024 a tihchhuahah diesel leh petrol litre khat zelah road maintenance atan Rs. 2.00 leh social infrastructure and services atan Rs. 2.00 bawk cess lak tura tih a ni a. Road Infrastructure Cess hi Road Fund Act 2007 nen kalkawpa lak niin, kawng siamthatna atana hman tur a ni a, Mizoram Road Fund Board-a hlan tur a ni. Social Infrastructure and Services atana cess khawnkhawm hi he notification-in a sawi: (i) human resources development infrastructure (ii) development of wellness infrastructure (iii) skills development leh, (iv) women centric project-a la sem leh tur a ni a. ‘Human resources development infrastructure’ tih hnuaiah hian ‘degree colleges’ pawh a tel tih an sawi.
Hetihlai hian social infrastructure and services hnuaia department/ sector te hnena sum pek dan tur semna atan Mizoram Finance department chuan Council of Ministers thukhawm resolution angin kumin August 21 khan hriattirna a tichhuak leh a. He hriattirnaah hi chuan cess dawng ve thei zingah college/ Higher & Technical Education department a tel ta loa, ‘human resources development infrastructure’ tih chu School Education department-ah chauh an kaltir zo ta vek tih an sawi a ni.
Higher & Technical Education minister, hetihlaia Taxation minister ni bawk Dr Vanlalthlana’n 2024 September 3-a thuthar thehdarhtute a kawmnaa a press statement-ah, cess hi zirna in tihchangtlunna atan hman a ni dawn tih a sawi bakah 2024 August 30-a sawrkarin cess a lakkhawm a hman lehna tura hriattirna a tihchhuahah pawh college tihhmasawnna atan tih hi a la tel ngei a, 2025 August 21-a sawrkarin hriattirna dang a tihchhuahah hian college lam an tel ve ta chu an rilru a na a, college lam chu zirna inah sawrkarin a chhiar tel ve lo nge, eng vanga college education chu an paih bo tih chu an zawhna a ni tih an sawi.
Degree college/ Higher & Technical Education lamin chan tur a neih ve ngei theihna turin Mizoram sawrkar thuneitute hma la turin a ngen tih ACCJSU hian a sawi a. He thu an tihchhuah 0 2025 September 23 atanga chhiar ni 7 chhungin an ngenna hian ngaihpawimawh a hlawh em tih an ngaichang anga, ngaihpawimawh a hlawh lo a nih chuan na zawkin hma an la dawn tih an sawi.
The Aizawl Post-in a zawhchiannaah ACCJSU president Lalremtluanga chuan, hemi chungchangah hian sawrkar thuneitu lam dawr an la nei loa, dawr erawh an tum tih a sawi a. Ni 7 chhung nghah an tih pawh hi ni 7 chiah chiah kher ni loin, a tha zawnga thil a kal dawn a nih chuan an fan thei tih a sawi a ni.