Mizoramah World Rabies Day hmang
Mizoramah World Rabies Day hmang
September 28 hi ui a hri laka kan ran vulh leh mihringte kan him theihna atana inzirtirna ni – ‘World Rabies Day’ a ni a, kuminah Pathiannia a tlak avangin hmun tam zawkah chuan AH & Vety Department, Mizoram State Veterinary Council (MSVC) leh Indian Veterinary Association (IVA) Mizoram tangho buatsaih Inrinni khan hman a ni.
Aizawla hmanaah chuan MSVC president Dr Lalremliana chuan ui a hri (rabies) chu natna hri hlauhawm tak a nih avanga tha taka vaccine lak a pawimawh tih a sawi a. Rabies chu a vei tawhten an thihpui ngei ngei thina ngaih a ni a, dam chhuak sawi tur tlemte chauh an la awm, tiin, ram changkangah chuan he hri hi an buaipui vak tawh loh laiin, Asia leh Africa ramah chuan mi tam takin an la thihpui a, a bikin ui seh avangin case a la tam phah hle tih a sawi a ni.
Khawlaiah neitu nei lo ui chhuak an awm loh avangte, vaccine pek kan ngaihpawimawh avang leh veterinary ni pawimawh bikah free vaccination leh health camp tha taka kalpui thin a nih avangin Mizoram-in rabies nuaibo theihna kawng kan la nei tha hle tih a sawi a. Kumin atana thupui thlan ‘Act Now: Me, You, Community’ tih chu MSVC hruaitu hian sawizauin, “Tlai khawmuang loa kan zavaia kan tanrual phawt chuan ui a hri tihbaiawm tak rabies hi kan umbo thei dawn a ni,” a ti.
IVA Mizoram president Dr Robert Rualthankhuma pawhin India ram pumah kum 2030 ralhma ngeia ui a hri nuaibo tuma theihtawp chhuah a ni tih a sawi a. Ui a hri nuaibo turin ui vaccine pek bakah uiin a sehten hri venna vaccine an lak nghal thuai a tul tih a sawi a ni.
Kumin World Rabies Day thupui atan hian ‘Act Now: You, Me, Community’ tih chu hman niin, Aizawl district-a hmun pathum – State Veterinary Polyclinic Hospital Khatla, Zemabawk North YMA Hall leh Animal Feed Plant Ramrikawn bakah District Vety Hospital tinah hman a ni a; a thlawna ui a hri venna vaccine (anti-rabies vaccine) pek beihpui thlak a ni. World Rabies Day pual hian Mizoram pumah ui 2600 chu hri venna pek an ni.
Wolrd Rabies Day hi Anti-Rabies Vaccine (ARV) hmuchhuaktu Louis Pasteur thih champha pualin kum 2007 atang khan kumtin September 28-ah hman thin a ni.