Central tlawn luat vangin CM hi dawl zawrin a zawr – MNF

Central tlawn luat vangin CM hi dawl zawrin a zawr – MNF
Sum leh development duh vang chauhin chief minister Lalduhoma’n sawrkar laipui a hnial ngam loa, an lakah dawl zawrin a zawr tih MNF party chuan an sawi.
MNF Gen. Hqrs. thuchhuak chuan, tunhnaia chief minister-in ZPM office-a thu a sawiah khan a thil tum leh a rilru dik tak alo lang a, kha kha Zoram tana pawi lian tak thlen theitu tur a ni, tiin, Zoram tana him lo thei zawng zela hma a lak luih mek lai a, ZPM party leh sawrkarna fawng chelhtute ring ngam tura midang a chah leh si kha thil inkawkalh leh awmze nei lo a ni tih a sawi.
Pu Lalduhoma’n Forest Conservation Act chu forest humhimna a ni tih a sawi leh Supreme Court-in TN Godavarman thubuai a ngaihtuahnaa forest a hrilhfiah dan a sawi chhawn kha thudik dinglai a nih laiin, he dan siamthatna, FCAA 2023 hnuaia central sawrkarin Mizoram chhunga thuneihna sang tak a rawn neih theihna tur rawn awm thar ta dodal a hnekin, Mizoram-in India danpui hnuaia humhimna a neih hlu tak Article 371G che lek ngam loin a palzut zawngin hma a la ta hlauh zawk tih MNF hian sawiin, Mizoram leh Mizo hnam tan a pawi a, Mizo hnam a ti thangtlawm tih a sawi.
FCA 1980, dan dinglai hnuaiah khaw zauhna tur emaw ramngaw behchhana eizawnna kalpui kawngah emaw Zoram mipuiin harsatna tawk loin hei chen an lo kal tawh a, hmasawnna ruhrel pawimawh pawh forest dan zawmin heti zat sawrkar kal tawhten an lo din tawh laiin, dan dinglai hnuaiah hian ramngaw behchhana eizawngtu, thingtlang lama cheng zawng zawng pawhin harsatna tawk vek tur ang zawnga chief minister-in a sawi leh, hmasawnna engmah thawh theih loh ang tluk deuhthawa a sawi chu mipui rilru kawng dik loa hruai tumna zahpuiawm tak a ni tih a sawi.
‘Nungchate humhalh bikna hmun (sanctuary) tibuai tur zawnga kawng laihtlang luih sawrkarin a tum dan leh, forest clearance hmuh theih loh vanga harsatna a thlen thu a sawi phei kha chu tunlai khawvel, ramngaw leh nungcha humhalh kawnga thanharhna thleng chho mek nen thil inkalh a ni. Mizo thalaite ngei pawh environment tichhe lo zawnga hmasawnna hnathawh (sustainable development) duhtu leh aupuitu an ni tawh tih hre phak lo chief minister Mizoram-in a hrawn mek a ni,’ a ti.
FCAA 2023-in state sawrkar thuneihna sang zawk a pe, tia Pu Lalduhoma’n a sawi chu thu belhchian dawl lo a ni tih MNF hian sawiin, he dan siamthatna leh a hnuaia dan tesep hi mi zawng zawng tan chhiar theih vek a ni a, state sawrkar awlsamna tura duan a ni loa, central sawrkar thuneihna sang tak pekna liau liau a ni tih chu thudik zawk a ni tih a sawi.
‘He dan siamthatna hian central sawrkar chu India venhimna kaihhnawih reng rengah Mizoram chhung khawi hmunah pawh forest clearance ngai loa kan ramngaw leh kan leilung a suasam theihna tur kawng a hawnsak a. Kawngpui, rel kawng, gas & oil pipeline, inbiakpawhna lam chi leh sipai awmna tur hmun thlengin awlsam takin a bun zung zung thei tawh dawn zawk. He dan siamthat hnuaiah hian lei chhungril hausakna haichhuah kawngah Mizoram chhung khawi hmunah pawh duh duha hmalak theihna tur thuneihna chu central sawrkar kutah pek a ni bawk,’ thuchhuah hian a ti.
Chief minister chu Mizoram himna aiin, defence kaltlanga hmasawnna ruhrel engemaw tal neih theih dan dap a, central sawrkar tlawn a thlang zawk tih, Mizorama kawngpui pasarih Defence ministry kuta hlan a nih thu leh kawngpui dang pawh hlan zel tum a nih thu a puan atang khan a langchiang em em tih sawiin, ‘Sum leh development duh vang chauhin, kum hnih liamta maia amah ngei pawhinin chelek ngam tura state sawrkar a lo nawr, danpui Article 371G chu central sawrkar tlawn vang chauhin a chelek ngam ta lo. Pu Lalduhoma hian Mizoram inhumhimna chabi pawimawh ber chu central sawrkar kutah a hlan fel der a; Mizoram leilung, ramngaw leh nungcha nasa taka tichhe tur zawngin, thang lo thar zel turte tan pawi nasa tak a khawih mek tih inhre chhuak a, inlamlet turin MNF chuan a ngen a ni,’ a ti.