A hre tlem tlem hi a hman hman emaw tih tur an ni – John Rotluangliana

A hre tlem tlem hi a hman
hman emaw tih tur an ni
– John Rotluangliana
ZPM sawrkarah a hre tlem tlem chu a hman hman emaw tih turin social media-ah Congress sawrkarin engmah ti lo anga an chhuah thin chu a tha lo hle tih Congress hruaitu John Rotluangliana chuan a sawi.
Inrinnia Champhai South Block Political Training, Champhaia neih a hmanpuinaah MPCC vice president John Rotluangliana chuan, Lengpui Airport chu Congress sawrkar siam a ni a; ZMC&H an tih tak pawh Congress sawrkar din a ni, tiin, MNF in ZMC a rawn tih, ZPM sawrkarin ZMC&H a tih leh chu Congress an sawrkar a nih chuan MIMER an ti leh anga, India ram chhung leh ram hrang hrang atanga research tih theihna atan an siam dawn tih a sawi.
“ZPM a sawrkar chuan Aizawlah rel a lo lut mai, te an ti; heng zawng zawng hi Congress sawrkar laia kan hmalak bul tan a ni tih mipuiin an hria. ZPM sawrkar avanga lo lut a ni lo. Kum rei fe hnathawh ngai a ni a, hmasawnna tam ber hi Congress sawrkar vang a ni. Rajiv Gandhi Stadium pawh thalai infiammite tana Congress party hnathawh a ni. AMC kan tih hi Congress sawrkar laia din a ni. Tunlai thangthar thenkhat chuan a awmsa emaw an ti maithei, mahse, Congress sawrkar din a ni. ZPM sawrkar hian central-ah BJP thawhpui anga lang ngam si loa an thurualpui a ngai a. Hei hi Congress party-in kan thlak a ngai,” a ti.
MNF-in ram tan hnutchhiah tha pakhatmah an nei lo tih pawh MPCC hruaitu hian sawiin, “Leiverh chungchang an han sawi a, tun thlengin a tak kan la hmu lo. Kawng chhawng pawh an sawi a, vawi engemawzat an thlirho. Mahse, tun thlengin a tak kan hmu loa, mang ram kha min sawikhum nasa mah mah thin a ni,” a ti.
Congress party tan êng a lang tan tawh a, beiseina an nei sang a, an beisei angin Pathian pawhin a thlen tir ang tih ring tlat turin an party mite a chah tih a sawi bawk.