Mizoram Super League (MSL) MBBA & Zonet TV Private Ltd. thawhdunna tur thlirnal
Mizoram Super League (MSL)
MBBA & Zonet TV Private Ltd. thawhdunna tur thlirnal
Mizorama basketball inelna sang ber Mizoram Super League (MSL) Season 11 chu MBBA annual calendar atanga a lan danin kum 2016, February leh March thla chhungin neih a ni leh dawn a; chanchin tarlan tawh angin MBBA leh Zonet chuan hemi chungchangah hian September ni 26, 2025 (Zirtawpni) khan thawhdunna tur inremna an lo ziak tawh nghe nghe.
Mizoram basketball sawi rual hian thenkhat hi chuan a pawp lai hnawh phui leh siam that lam ngaihtuah map lovin an sel nghal bawrh bawrh a – awmzia a awm lo! Kil hrang hrang dapin, hun hmasa lama tihphung fuh tawk lote tarlang telin hmathlir fim tak nen ngaihtuahna i han sengho teh ang u.
The Aizawl Post Hoops Mania chuan a lo tarlan tawh thin angin, basketball hi football tih lovah chuan Mizo zingah tuichilh an tam ber a, sum virvel a sang fal ber bawk awm e. MSL club zingah cheng nuai 20 chuang season khata thehchhuakte an awm tawh tih hre telin, he infiamna huanga hniak hnutchhiah hi Mizo hnam chanchin a ni tlat – hnam dang zinga he infiamna hmanga Mizo hmingthatnate hi he game tuichilh lo tan pawh Mizo hnam mawina a nih miau avangin en liam satliah theih a ni ta lo!
MBBA leh Zonet-in kum thum chhung inremna an ziah thar hi MSL bul tan tirh kum 2015 kha chu la ni ngai se, Mizo basketball than zelna tura tum khat tal ngaihtuahna lo seng tawh tan chuan ring taka kut benna tur a ni – season 10 zet Zonet lamin MSL a ring a rawlh hnuah erawh hi chuan duhkhawp lohna a tam ta hle.
MSL Season 10 neih zawh tak atanga tehin
1) Bul tan tirh lam thlirlet kha chuan Zonet lam hian boruak siam kawngah tha an thawh tha hle; mahse, a rei tial tial a, ngaiah an nei ta em ni aw tih turin boruak a dulin a zuih hle a; semi-final hma lam phei chu entu mipui an thawkchhuak tha lo tulh tulh a, mipui hip khawm thei turin Zonet lam tha thawh hi a pan hling hleng hle a, MSL board lam pawhin chuti takin an tan lakna hmuh tur a awm lem lo!
2) Zonet lam hian inkhel a hmuna en thei lote tan inkhel boruak sang leh hmawr tawp lam, Youtube-ah lei kher ngaia an dah thin chuan inkhel thlirtu a tih tlem phah!
3) MSL board thuchhuak a tlai thin a; he inelnaa thapui leh sum thawh MSL club tan hnam dang chah luh chungchangah ngat phei chuan MSL inkaihhruaina an dawn tlai hian an club sum a nghawng lawih tlat!
MSL XI hi kum 2026 February thlaa neih tur a nih dawn avangin MSL board hian MSL XI inkaihhruaina an peih ran a tul. A bikin MSL club tan hnam dang player kal velna senso leh a dang tam taka sum an sen tlem theihna tur hi MSL board hian a ngaihtuahna chhungril bera a dah a ngai.
4) MSL fixture hi siksawi a nihin hnam dang player contract a su buai nghal. R. Dengthuama Indoor Stadium hawh chungchangah erawh tournament organiser MBBA tan hriat lawk loh avanga fixture pawhsei a ngai ve thei tho tih erawh hriat tel a tha.
5) Hnam dang, a bikin vai player-te (inter state player) hian MSL aia India rama basketball league boruak lian leh changtlung a awm loh avangin Mizorama rawn khelh hi a chakin an chak thang huam!
MSL Club lamin player lakluh (bazar) kawngah harsatna an tawh thin pakhat chu vai player an to thut thin hi a ni.
Hemi chinfelna tur hian MSL board lamin sum hman theih zat khuahkhirhna a duang ngai miau lo va, club lian leh te inkar a zau nghal!
MSL I-X ah khan a tir lamah hnam dang khan inelna an tihmuhnawm hle a, hun a rei a, Mizo kutah MSL hmuhnawmna a awm ta!
Hetiang karah hian MSL XI erawh hnam dang tel lovin MSL board lam hian inelna an neih ngam a rinawm loh a; mahse, hnam dang dawrna tur hun erawh zau tak hawn a ngai tawh thung tih hi hun kal ta atang khan a hriat!
Mizoram Premier Leage (MPL) hi season 12-na an khel mek a, Aizawl FC leh Chanmari FC hi season 1 atanga la khel awmchhun an ni a; MSL lamah pawh Zarkawt BCA leh Khatla TBL chiah hi season tin la inlan thei awmchhun an ni!
Heta tanga lang chu Mizoramah hian sports hi uarin tuipui hle mah ila awmze neia club inrelbawlna lama sum thawhtu erawhin hun rei tak an daih thei lo – hlawkna chu sawi loh, hloh hlir ni hek!
MSL board hi MSL-a thuneitu sang ber an nih miau avangin sum tam tak sen ngaihna hnam dang player tel lo hian Mizoram Basketball Inkhawmpuilian (MSL) hi nung taka a kal zel theihna’n mahni beng mai sik lo va club sum senso sang lutuk hi tihtawp a ngai.
Hnam dang tel lo va MSL neih chhunzawm kan zuam lo a nih pawhin player dap khawmna hun hi thawl tak club lamin an neih a ngai.
6) MSL board lamin inkaihhruaina dan a siksawi chungchangah MSL X kha han thurchhuak ila; vai player pahnih lak belh theih a nih thu chawpchilh takin club a hriattir a, sum a nghawng nghal.
MSL tih a rik rual hian vai player man hi thununtu awm hek lo, a sang nghal talh zel. Fim taka thlirin foreigner pakhat leh inter state pakhat hi Mizorama football leh basketball top club dinhmun thlir hian a tawk!
Inelna hmuhnawm leh tang tak kan hisap lai hian a thuneitu lam hian mi sum hmanga SHOW buatsaih kan ang thei – fimkhur a ngai, hnam khawih thil a ni!
7) Khawvel hmun danga hmuh tur vang tak, MSL atanga club tlakna (relegation) mawng pawp – club 8 atanga club 3 mawlh hi!
MSL hun hnuhnung lama club 8 atanga club 3 tlak thawt mai hi chu Mizo basketball than zelna atan tur (poison) a ni hawt!
MSL hnuaichiah D League atangin club 3 kaichhoh a awlsamna atanga teh chuan a awm thlup, amaherawhchu, MSL club-a kai thei tur hian senso paltlang ngai, hun leh tha zawng zawng ngaihtuahin semi-finalist chin an him hram a ni deuh thaw a, club changtlung leh ngialnghet an tlem pharh phah!
Why Always Zonet?
MSL tih a rik ruala Zonet lo lang nghal hrim hrim hi hun hmasa lama MBBA tana Zonet thawhpui hlawkzia hre loa an hun hnuhnung lama an servive chauh hmu tan chuan ‘engvangnge Zonet tih reng mai?’ tih zawhna hi a awm viau. A tawi zawngin sawi ila, kawng awm lo ata kawng thar MBBA tana sialtu Zonet hi MBBA puipa lamah a tla na tihna a ni mai.
Zonet tan inremna a awm ta sa sa, an hun hnuhnung lama an chet pawrna te, rei tak inkhelh laia technical problem awm sek thin angte kha chinfelna tur hun duhawm season 3 an nei a – an hman thiam chuan ‘Zonet nge nge…’ tih hi a ri leh ang. An production crew lam an aiawha MSL-a inlan thinte kuthnu MSL XI-ah hian teh runpuiin a awm dawn e.
Mi hmuh loh lamah
Thil tha, rawtna bengvarthlak leh pawmawm sawi thiam hi chu an tam. Chutih rualin, MBBA lama sum daptu (Fund Raising Sub Committee)-te’n nasa taka hma an lakna zarah MBBA ke chheh hi a fuh chho hle.
Sum hi a awm loh chuan chet ngaihna a awm miau lo va, sum dap a harzia hre rengin MSL XI inbuatsaihna kawngah pawh hian a daih rei leh tlo zawngin, Mizo thalai tam tak atchilh basketball inher velna lama puipate’n hma han la sauh sauh teh se.
Mahni rah chin leh tih chin en mai lovin, mi dang che vel pawh thlir thiam a ngai tak zet. We love this game…
Mizoram Super League XI (2026) KHEL TUR CLUB-TE:-
1. Zarkawt BCA – Mimal sum hmanga inrelbawl
2. Khatla TBL – Mimal sum hmanga inrelbawl
3. Chanmari BC – Mimal sum hmanga inrelbawl
4. Zemabawk BC – Mimal sum hmanga inrelbawl
5. Saron BC – Mi hrang hrang sum thawhkhawm
6. Mission Veng Hotshots – Mi hrang hrang sum
thawhkhawm
7. Chhinga Veng BC – Mimal sum hmanga inrelbawl
8. Tuikual South BC – Mimal sum hmanga inrelbawl
Club lam hian a hmingin sponsor-te hi han hmu ve nawlh thin mah se an senso erawh a san miau avangin chuti takin sponsor an hmuh vete pawh hian an sum hman chhuahah hian kawngro a su lo fo.