Barca a No 10 larpuitute

Spanish club lian FC Barcelona a an Jersey number ngaihhlut hlawh tak, an player ropui ber berte an haktir thin chu No. 10 a ni. Player ropui tak takin an lo hak tawh No. 10 hi rawlthar duhawm Lamine Yamal-a’n a ha tawh dawn. Yamal-a’n a hak hmasa Barcelona Jersey No 10 haw tawh, player ropui leh hlawhtling zualte kan tarlang ang.
9. Evaristo de Macedo : Kum 70 zet liam tawhah khan Brazil player ropui, forward tha zet mai, goal hmaa hriam tak mai a awm a, a hming chu Evaristo de Macedo a ni. Evaristo hian Brazil club Flamengo-ah hun chhinchhiahthlak tlak a hmang a, vawi 151 a khelh atangin goal 105 zet a thun. Flamengo-ah a khelh that theih em vangin kum 1957 khan Europe club lian FC Barcelona a zawm. Barcelona hi La Liga-ah vawi hnih a champion pui a, La Liga bikah vawi 114 khelin goal 78 a thun. A hun lai hian Barcelona player pawimawh leh ngainat hlawh tak a ni.
Barcelona-ah a hming a chher len hnuin Barcelona hmelma lian ber Real Madrid a zawm teh tlat. Real Madrid-ah erawh hlawhtlinna a chang zui ta lo thung. Nou Camp chhuahsanin an hmelma lian ber Real Madrid zawm bawk mah se Evaristo hian Barcelona tantute ngainat leh zah a hlawh zui viau tho thung.
8. Gheorghe Hagi : Gheorghe Hagi hi Romanian footballer tha bera ngaih ngheh a ni a, a hun laia attacking midfielder tha leh hmuhnawm ber pawl a ni. Real Madrid tan a khel hnuin FC Barcelona hi a zawm. Barca hian beiseina sang tak nen la lut bawk mah se hliamin a tibuai nasa em em a, kum hnih chhungin La Liga-ah vawi 36 chauh a khel a, goal 7 a thun. Beisei angin khel tam lo mah se a khelh chhunah a khel thain a hmuhnawm em em zel a, lawm a hlawh hle zel tho. Hliam vangin par chhuang thei lo mah se, Barcelona a Jersey No.10 ha tawh zinga hriat hlawh zual zingah a la tel ta reng tho.
7. Luis Suarez
Luis Suarez pakhat chauh an awm lova, Barcelona-ah Uruguay forward Luis Suarez aia khel hmasa leh lar hmasa Luis Suarez a lo awm reng. Kum 1950 atanga kum 1960 tir lam thleng khan Luis Suarez hi player tha leh lar ber pawl a ni a, tun thleng hian Spanish player ropui ber zinga chhiar tel la ni reng. Club leh ram tan a khelh that thei em vangin Luis Suarez hian kum 1960 khan Ballon ‘Or a dawng a, Spanish player zingah Ballon d’Or dawng thei hmasa ber a ni nghe nghe. A that vanglai takin Inter Milan zawm san daih mah se Luis Suarez hi Barcelona player ropui, an club tantute zah rawn a ni zui zel tho.
6. Hristo Stoichkov
Bulgaria hero Stoichkov hi Barcelona player zinga thawm nei lian ber pawl a la ni reng. Tlarhmaah Romario nen an inkawp ngat phei chu dan an harin, defender ten an huphurh hle thin. Barcelona-ah No 10 a hak lai hian mimal chawimawina sang Ballon d’Or a dawng hial. 1993-94 season khan La Liga-ah Barca hi a champion pui nawn leh a, Golden Ball a dawng hial nghe nghe. Barcelona chhuahsan a Parma a zawm hnuin No. 10 hi tlarhmaa a kawppui Romario-a’n a rochun zui ta a ni.
5. Romario : Stoichkov chhuah hnu a No 10 ha chauh a nih vangin Romario hian No. 10 a ha rei lo. No. 10 ha rei hman lo mah se Barcelona player ropui ber zinga mi a ni thung. Kum 1993 khan PSV atangin Barcelona hi a zawm a, Johan Cruyff enkawl Barcelona team kha ‘Dream team’ ti hiain an sawi thin. Barca tan a season hma berah hian vawi 32 zet khelin La Liga-ah a champion pui nghal a, El Clasico-ah hat-trick a siam vangin a lar leh zual hle. Cruyff duhsak a hlawh zawh loh hnuin Romario hian kum 1955 khan Barcelona a chhuahsan a Brazil-ah a kir.
4. Rivaldo : Brazil player tha leh Barcelona jersey No. 10 hi an inhmeh fu. Brazil forward hmuhnawm Rivaldo hian Barcelona no 10 a hak lai kum 1999 khan Ballon d’Or a dawng. Barcelona tan a khelh lai hi hun harsa, hun inthlakhleng lai a ni a, inelna hrang hrangah an ropui tawk lo. Team angin hlawhtlinna chang tam lo mah se Rivaldo hi chu mimal takin a chetha a, a lar em em reng thung a, Barcelona No. 10 ha tawh zinga inhmeh leh hlawhtlinpui ber zingah a tel.
3. Diego Maradona
Ball thiam leh ropui sawi a pianga sawi hmaih theih loh, player tha thlana tla hma lama hmun chang reng tur Maradona hian kum 1982 khan Boca Junior atangin FC Barcelona a zawm. Barca hian Maradona lak nan £5m an seng a, hetihlai hian khawvela player manto ber a ni. Barca-a a awm lai hian hliamin tibuai nasa mah se lawm a hlawh em em reng thung. Barca tan hian vawi 58 chauh a khel a, goal 38 thunin, assist vawi 23 zet a nei hman bawk. Barca hi La Liga-ah a champion pui vangin a hming a tha hman hle. Hmingtha hman viau mah se Atheltic Club nen Copa del Rey final an khelhah buaina nasa tak a chhuak a, buainaah a inrawlh nasat vangin Barcelona hi hmingchhe takin a thlah a, a ropui leh zualna Napoli a pan ta dih thung.
2. Ronaldinho : Ronaldinho hi player hmeltha leh nui mawi ber a ni lo mai thei a, chawimawina sang dawng hnem ber leh hlawhtlina chang tamber zingah a tel lo mai thei bawk. Mah se, ball thiam chungchuang bik erawh a ni chiang mai a, ani tluka hmuhnawm an awm kher lo mai thei bawk. Ronaldinho hian kum 2003-2008 chhung khan Barcelona-ah hun a hmang. Barca tan a khelh chhung hian Ballon d’Or a dawng a, Barca hi La Liga leh Champions League-ah te a champion pui bawk. Barcelona no 10 ha tawh zawng zawng zinga inhmeh leh hlawhtlinpui ber zinga mi a ni.
1. Lionel Messi
Messi hi footballer piangchhuak tawh zawng zawng zingah ropui bera ngaih a ni a, Barcelona player awm tawh zawng zawng zinga ropui ber a ni tel bawk. Messi hian Barcelona tan bul a tan tirh chuan No 30 a ha thin. Hetihlai hi player ropui Ronaldinho te awm lai a la ni. Messi hian kum 2008 atangin No. 10 a ha tan. No. 10 a hak chhung hian Ballon d’Or vawi sarih ngawt a dawng a, Barca hi La Liga-ah vawi sarih champion puiin champions league-ah vawi thum a champion pui bawk. Barca tan No. 10 a hak chhung hian goal 624 zet a thun tling hial bawk.
An sum dinhmun a that loh em vangin Messi hian kum 2021 khan Barcelona a chhuahsan a, PSG a zawm. PSG-ah contract a hman zawh hnuin Inter Miami tan a khel mek a, season kal mekah Inter Miami tan a chetha viau bawk.
0. Yamal
Player ropui leh hlawhtling tak tak ten an lo hak tawh thin Barcelona Jersey No. 1 chu rawlthar kum 18 mi Lamine Yamal an a ha ve tan dawn. Kum 18 mi chauh ni mah se Yamal hi Super star a ni der tawh. La Liga, Copa del Rey leh Super Copa-ah te Barcelona a champion pui tawh a. Spain chu Euro 2024-ah a champion pui bakah UEFA Nations League final a hruai thleng bawk. Euro khel thei naupang ber a ni a, Euro 2024-a goal mawi ber thuntu a ni bawk. Khawvel leh Europe-a rawlthar tha ber chawimawina a dawng ve ve tawh a, La Liga-ah kum 23 hnuai lama player tha berah vawi hnih thlan a ni tawh bawk. 2024-25 season-ah a chet that em vangin Ballon d’Or dawng tur a rinkai zingah a tel. Ballon d’Or dawng thei tura chhawpchhuah tawh zawng zawng zinga naupang ber a ni hial bawk.
Yamal hian Ballon d’Or dawng thei naupang ber record siam ta rih lo mah se, kum 2018 atanga semchhuah rawlthar tha ber ‘Kopa Trophy’ erawh vawi hnih a dawng tawh a. He chawimawina vawi hnih dawng thei hmasa ber a ni tho thung. Kum 18 mi lek ni chunga a goal thun zat hi Lionel Messi, Cristiano Ronaldo leh Kylian Mbappe te pawhin an phak lo hle. Heti a nih vang hian Barcelona number ngaihlut No. 10 hi a inhmeh viau tura ngaih a ni.