MZP-in zirlai harsate puihna Students’ Aid Fund siam dawn

MZP-in zirlai harsate puihna
Students’ Aid Fund siam dawn
Mizo Zirlai Pawl chuan zirlai zingah khawsak harsa zualte an zirna lama puih theihna tur Students’ Aid Fund a siam dawn.
MZP Gen. Hqrs. term thar, 2025- 2027 a vawikhatna chu Thawhlehni khan an thukhawm a. Students’ Aid Fund hi a rang lama siam nise an ti a. Rules leh guidelines mumal tak siam a nih hunah zirlaiten an hman tangkai theih tura dil theiha chhawpchhuah nise an ti.
Sairang Rel Station-a hnamdang lo luh dan endika tlawh thuai nise MZP chuan a ti a. Inner line permit neih dan chu Aizawl khawpui chhungah hun remchang hmasa berah endik nise, ILP pek chhuah a nih dan leh ILP hman danah thil fel tawk lo tam tak a awm nia hria in, zirchian nise tiin a rel bawk.
Aizawl-a International Trade Expo neih tum chu an sawiho a. Hei hi Mizoram Merchant Association (MIMA) nen pawh an losawikhawm tawh tih sawi niin, Mizorama hnamdang rawn sumdawngte dawr lo tur leh hnamdang hnenah sumdawnna atana hming hawh tir lo turin Mizo mipui a ngen tih MZP chuan a sawi a ni.