Crystal Palace an chak zel

Season tharah rin phak baka khel tha, EPL-ah tlawm nei lova kaltluang awmchhun Crystal Palace chu Europa Conference League lamah pawh an khel tha chhunzawm zel. Palace hian Europa Conference League-a an match hmasa berah mualneitu Dynamo Kyiv chu si hnih faiin an hneh nghal.
Inelna hrang hrangah tlawm nei lova kal tluang mek Crystal Palace hian Ukraine club Dynamo Kyiv hi Poland-a Motor Lublin Arena-ah an hmachhawn. Mikhual team an nihna mualah an khel tha a, kim lo chungin a tawp khar bawk mah se si hnih faiin hnehna an chang tho thung.
Eagles tan hian Daniel Muñoz chuan minute 31-naah hmahruaina goal a thun a, he goal hmang hian si khat faia hmahruai chungin chawlhlawk a hmang.
Chawlhlawk hnu lamah Palace an khel tha chhunzawm a, Eddie Nketiah chuan minute 58-naah an goal hnihna a thun a, an hmahruaina a tizau. Si hnih faia hma an hruai hnuin Borna Sosa chu minute 76-naah hnawhchhuah a ni. Tam zawk an nih hnuin Synamo Kyiv in an si phurh sut tumin tan an khawh nasa hle. An mikhualte nawr viau thin mah se Ukranian club hian hun tawp thlengin goal an thun thei lova, Crystal Palace lakah si hnih faiin an tlawm zui ta a ni.
Ningani zana inkhel dangah champion tura rinkai zinga mi Sparta Prague chuan 4-1 in Shamrock Rovers an hneh.