Taylor Swift-i’n ‘The Life of a Showgirl’ album a tlangzarh ta

Taylor Swift-i’n ‘The Life of a Showgirl’ album a tlangzarh ta
Taylor Swift chuan a album thar, a studio album 12-na ni bawk, ‘The Life of a Showgirl’ chu nimin khan a tlangzarh ta a, a album title track-ah Sabrina Carpenter nen an zaidun bawk. He album thar hi July thla vel atang khan a tlangzarh tur thu hi a lo puang lawk tawh a, hla 12 awmin, album-a hla zawng zawng phuahtu zingah a tel vek a, Max Martin leh Shellback te nena an produce a ni bawk.
He album-ah hian Swift chuan tun kum hnih kalta chhunga a nun a thlir let a, a hun tam zawk chu Eras Tour neiin, hmun hrang hranga zinkual nan a hmang a. He album-a hla pakhat ‘Father Figure’-ah chuan George Michael a tarlang tel a, 1987-a George Michael hla hit nen a hla title hi a inang nghe nghe.
He album atanga lead single ‘The Fate of Ophelia’ music video pawh October ni 5-ah a tichhuak nghal dawn a, tun weekend chhung hian ‘The Official Release Party of a Showgirl’ event chu cinema hall-ah an tichhuak dawn a, hetah hian a music video hi a premiere nghal dawn a ni.
Swift hian album hnuhnung ber ‘The Tortured Poets Department’ a tlangzarh atanga thla 18-naah a album thar hi a tichhuak leh a, album-a hlate hi Eras Tour a neih laia a record-te niin report a awm bawk.