Trump-a rawt angin Hamas leh Israel indawr tan

Trump-a rawt angin Hamas leh Israel indawr tan
US-in a beisei leh a ruahman anga Gaza-a indo a tawpna tur leh mi hrente chhuah an nih theihna tura inbe turin Pathianni khan Hamas hotute chuan Egypt an thleng a, Washington palai chuan ni hautak tak an thleng dawn tih a sawi.
Israeli aiawh, Strategic Affairs Minister Ron Dermer-a kaihhruaite pawhin Thawhtanni khan Egypt-a Red Sea kama chawlhna, Sharm el-Sheikh-ah US President Donald Trump-a’n kum hnih dawn indona awm tawh titawp tura a rawtna sawiho turin an pan ve bawk.
“Rang takin Hamas hian thil an ti tak tak em tih kan hre thuai dawn,” tiin US Secretary of State Marco Rubio chuan Gaza-a mi an la hren 48, la dam 20 nia ngaihte chhuah chungchang chu Pathiannia NBC News-a ‘Meet the Press’ hunah a sawi.
A hnuah Trump-a chuan indawrna hian rang takin hma lam a pan tih a sawi a. “A thawh khatna hi tun kara zo turin ka hrilh a, tute pawh hmanhmawh taka che turin ka nawr,” tiin social media-ah a tar lang.
Thawh khatna inremnaah hian mi hrente chhuaha lehlam atanga Palestinian lung in tangte chhuah ve tura ruahman a ni.
Hamas aiawhte hi Gaza chief tlanchhe mek, Khalil Al-Hayya-a’n hovin Pathianni zan khan US leh Qatar aiawhtute zawmin Egypt an thleng.
Tun hi thla hmasaa Qatari khawpui, Doha-a Israel-in an kaha a dam chhuah hnuah Hayya-a’n Egypt a tlawh hmasak ber a ni.
Trump-a hian Gaza-a indona titawp turin rawtna 20 a nei a, hetah hian mi hren mekte chhuah bakah Gaza Strip kal zel dan tur pawh a tel a. Israel leh Hamas chuan rawtna thenkhat chu an pawm ve ve tawh.
Hamas hian Zirtawpni khan mi hren chhuah hi an remti tawh a; mahse, ralthuam tung tura tihna thil dang neuh neuh erawh an la pawm thei mai rih lo.
Trump-a chuan Hamas chhanna hi tha a tiiin ‘muanna tluantling a awm theih nan an inpeih’ tih an lantir niin a ngai a. Israel pawh Gaza beih chhunzawm lo turin a ti nghal a; mahse, zawm a hlawh lo.
Rawtna hi a taka chan ngei ring Palestinian tam tak an awm laiin Israeli-te chuan Pathianni thleng pawh khan Gaza an la bei nasa hle a. Thlawhna leh tank hmanga an chhut zui zelnaah mi 19 vel an thi niin tual chhung damdawi in thuneituten an sawi.
Israeli-te zingah pawh Trump-a ruahmannain a tak a chan theih beiseitu an tam hle a. Tel Aviv-a cheng pakhat, Gil Shelly chuan, “Thla tam tak hnua beisei tak tak a awm a. Trump-a hian kan tan beiseina tam tak min siamsak a ni,” a ti.
Israeli President Benjamin Netanyahu-a chuan indo titawp tura nawrtu a ngah hle a, mi hren chhungte leh mi nawlpui, indona tuartute lainattute an tam a. Hetih lai hian a kaihhruai sorkara a thawhpuite chuan Hamas chhut chimih an la duh zel.
Far-right Finance Minister Bezalel Smotrich-a leh Security Minister Itamar Ben-Gvir te chuan Gaza indo hi a tawp chuan Netanyahu-a sorkar paih thlak an tum.
Tar lan tawh thin angin October 7, 2023-a Hamas-in Israel chhim lam beia mi 1,200 chuang an thah leh hren tura mi 251 an hruai hnuah Israel hian Gaza hi a bei zui a, tun thlengin mi 67,000 chuang an thi tawh niin Gaza health ministry chuan a sawi.