Ngaihngam taka mipui an awm theihna khawp buhfai kan chhek – Supply minister

On Oct 9, 2025 5 0

Ngaihngam taka mipui an awm
theihna khawp buhfai kan chhek
– Supply minister
Tun dinhmunah supply kudam-ah ngaihngam taka mipui an awm theihna tur khawp buhfai an chhekkhawl tih Supply minister B Lalchhanzova chuan a sawi.
Food Civil Supplies & Consumer Affairs department chuan an kudam zawng zawngah digital weighing scale (DWS) thar an hmang dawn a. Heng DWS 112 hi Nilaini khan minister hian a khuhhawngin Saitual, Khawzawl leh Champhai district-a hman tur DWS 35 phurtu lirthei a vailiam nghal.
An department kudam zawng zawnga DWS hman a ni tawh tur chu lawmawm a tih thu FCS&CA minister hian a sawi a. Mipuiin sawrkara rinna an nghah theihna tura hmanraw tangkai tak a ni, tiin, an department chu thla tina mipui mamawh petu an nih avangin dik leh rinawm taka hna an thawh a pawimawh tih a sawi.
Digital weighing scale (platform type) leina tur hi sawrkar atangin cheng nuai 86 hmuh a ni a. Original equipment manufacturer hnen atanga direct-a lei niin, tender chhangtu company pali atangin Weightex Scales Haryana thlan a ni. DWS hi district hrang hranga FCS&CA kudam-a hman tur 112 lei a ni a, tum khatah quintal 25-a rit a buk theih. Kumin August 29 khan Haryana atanga rawn phurh chhoh niin, September 11 khan Muanna Veng kudam phurh thlen a ni. A company technician-ten September 19 khan an remkhawm a ni.
Kumin October 7 thleng khan Govt. Muanna Godown-ah hian buhfai quintal 33075.76 leh chini quintal 208.94 chhekkhawl a ni.