Africa pan tur mute hoin Mizoram rawn hrut hnai

Africa pan tur mute hoin
Mizoram rawn hrut hnai
Thlasik laia ram lum zawka pem thin Sialsir (Amur Falcon) chuan an chenna ber Mongolia, China leh Russia bawr chhuahsanin South Africa an pan thin a, an zinkawngah India hmarchhak an rawn hrut thla thin. Mizoramah pawh thla khat vel an cham thin avangin hemi chhung hian mipuiin tibuai loa, chawlh hahdam tir zawk turin an ngen tih Centre for Environment & Social Justice chuan an sawi.
CESJ thuchhuah danin, Sialsir ho hi sahel ei chi sava zingah chuan hriat theih china pem thui ber an ni a. Mongolia, China leh Russia atang hian thlasik khawvawt tlansanin South Africa-ah an pem thin. South Africa an panna kawngah October thla laihawlah hi chuan Mizoram pawh an lo thleng tawh thin.
‘An zinkawng thui leh hautak zet an zawh chhuah theihnan chakna an mamawh hnem hle a, inei thau a ngai a. An zinkawng atana chakna khawlkhawm tur chuan chaw tha tinreng an ei a ngai. Chumi atan chuan Mizoram leh a chhehvel, India hmarchhakah an rawn fuankhawm thin a. Phingphihlip leh rannung dang an ei ber a, sava te deuh an man ve zauh tih hriat tur a awm bawk,’ a ti.
November-ah chuan Mizoram an chhuahsan fel thawkhat tawh thin nia hriat a ni. An cham chhung hian rannungte ho eiin chakna an chhekkhawl a, an hmanhlel ve hle thin tih a sawi.
An zinkawng a thuiin a hautak a, India khawmualpui leh tuifinriat (part of Bay of Bengal and Arabian Sea) an paltlang a tul thin tih CESJ hian sawiin, ‘Kum 2013-a Nagaland atanga satellite tracker an vuahna Sialsir pa, ‘Naga’ an tih chu Nagaland atanga Mizoramah rei vak lo a chawlh hnua a thlawk leh hi chawl miah loin ni 5 leh darkar 10 a thlawk a, Africa khawmualpui hi Somalia vaukamah a kai,’ a ti.
Mizoramah sava chi hrang 679 vel awm anga ngaih niin, chu’ng zingah chuan thlasik laia lo pem thinte, nipui laia lo cheng thin bakah an pemna kalkawnga min rawn paltlang thin engemawzat a awm a, a tam zawk erawh kan rama cheng nghet an ni tih CESJ hian a sawi.