Vohbik naupangte Fest’ siamsak

State Council of Educational Research and Training (SCERT) hnuaia Special Education Cell bultumin vohbik naupangte tan ‘Colours of Inclusion 2025 – Fest for Special School Children’ chu SCERT office kawtzawlah Ningani khan hman a ni.
SCERT director Caroline Zoramthangi chuan vohbik naupangten khawtlanga inthlahrung loa nuam ti taka an awm ve theih a pawimawh a, activity hrang hrang hmanga mahni inrintawkna siamsak a, midang nena chenho thiam leh thian kawm thiam zirtirna atante, an taksa, rilru leh hriatna chi hrang hrangin hma a sawn theihna atan a pawimawh tih a sawi.
Special Education Cell hi kum 1986 khan SCERT hnuaiah din a ni a. He Cell-in a tum ber chu, Mizorama inclusive education tihchangtlun leh hmasawntir a ni. Vohbik naupangte hmasawnna ngaihtuah leh an mamawh chi hrang hrang inang lo tak tak phuhruk sak an nih theihnana hmalakna pakhat atan he festival hi huaihawt a ni.
He Festival-ah hian naupang intihhlimna hrang hrang dah a ni a, a zai duh tan pawh nilenga an zai theihna tur stage siam niin, vohbik school naupangte thilsiam phochhuahna tur stall engemawzat siam a ni bawk.
Festival-ah hian school 6 – Govt. Primary School-II Durtlang; Special Blind School Durtlang; Redeem Garden; Ephatha Special School; Gilead Special School leh Shining Star School atangin naupang 119 an tel a ni.