Ngaihngam takin kan ramah hnamdang rawn zin thei se – Chief minister

Ngaihngam takin kan ramah
hnamdang rawn zin thei se
– Chief minister
Mikhual nei thiam, hnamdang khawsak pui thiam kan nih a ngai a. Kan ramah ngaihngam takin hnamdang an rawn zin thei tur a ni, tiin chief minister chuan a sawi.
Mizoram Tourism department leh sawrkar laipui Ministry of Tourism tangdun buatsaih Travel Fest 2025 ni hnihna, Ningania Aizawla neih a hmanpuinaah chief minister chuan, Mizoramah nasa takin tourism industry a thang mek a, kum hmasa statistics atanga a lan danin, khualzin zaa 139.50 in an pung tih a sawi.
Kum kalta khan mi 520000 chuang state dang leh ramdang mi Mizoramah an rawn zin a, kan state mipui zatve deuhthaw a ni, tiin, rel lo lut hian nasa zawkin a tih pun ngei a rinawm tih a sawi a ni.
“Hei vang hian mikhual nei thiam, hnam dang khawsakpui thiam kan nih a ngai. Kan ramah hnamdangte ngaihngam takin an rawn zin thei tur a ni. Zonun ze mawi, tlawmngaihna leh rinawmna, hawihhawmna kan lo chawinun thiam chuan sum leh paiah chauh hlawkpui loin kan ram leh hnam a par vul tel dawn a ni,” chief minister hian a ti.
Mikhual lokal tam ber tur chu Vai kan tih mai, kan Indianpui an ni dawn tih sawiin, “Tumah lo hlauh ngawt tur an ni loa, lo hmuhsit tur pawh an ni lo. Dan ang taka rawn zin, an haw a huna haw ve leh mai tur an ni a. Kan rama sum leh pai an rawn thlauh kha kan tan a tha em em a ni,” a ti.
Hma kan sawn zel theihnan kan mamawh dik tak hriat a tul tih chief minister hian a sawi a. Hmalakna tur dik takah zel kut thlak chat chat ila, kan resource neih ang ang hlawk takin kan hmang thei dawn, tiin, chumi atana tangkai Mizoram Travel Fest 2025 buatsaih a ni chu a hlu hle a, a ngaihtuah chhuaktu minister leh a thawhpuite chungah lawmthu a sawi tih a sawi a ni.
Tourism minister Lalnghinglova Hmar chuan tourism hmasawnna tura sawrkar hmachhawp a sawi a. Tourism department leh Environment Forest & Climate Change chuan eco-tourism kalpuina tur inremna (MoU) an ziak a ni.
Travel Fest ni hnihnaah hian INDeco founder Steve Borgia chuan “Role of Community Partnership in Sustainable Tourism” tih thupuia hmangin thu a sawi a, chawhnu lamah hun hman chhunzawm a ni bawk.