Minister-in department hotute kawm

Minister-in department hotute kawm
Minister B Lalchhanzova chuan a department chan thar – Information Public Relations, Printing & Stationery (IPRP&S) department-a administrative officer-te leh directorate lama senior officer-te chu Ningani khan kokhawm a. Sawrkarin I&PR leh P&S kalpui a duhdan leh hmachhawp a sawipui.
Department official-te chu department dang tha taka thawhpui thiam turin a chah a. A department hnuaia hmalakna kaihhnawihah minister-in a hriat tur awm chi reng reng chu thutlukna tha zawk siam a nih theihnan a hnena thlen thuai thin turin a chah.
Sawrkarin mipui tana hna a thawh, hma a lak mek, thutlukna a siam, mipui tana hamthatna a siam ang chi chu a nihna tur anga mipuiin an chhawr theihnan, mipuiin chiang takin an hriat a ngai tih a sawi a. Notification, schemes, policy leh sawrkar hmalakna puanzar leh zirtir kawngah Information & Public Relations hman tangkai lehzual a ngai, tiin, hemi kawngah hian department tinin I&PR kaltlangin public relations huanga tan an lak thar a ngai tih a sawi. Sawrkar department hoin Printing & Stationery an hman tangkai dan pawh ennawn a tul tih a sawi bawk.
Minister hoa thutkhawm hmasaberah hian IPRP&S secretary Betsy Zothanpari Sailo chuan department hmalakna tlangpui a sawi a. I&PR director K Vanlalsangi leh Printing & Stationery controller Benjamin Lalzama ten report an pe zui a ni.