Starmer-a’n India nena an inremna a taka kalpui thuai duh

Starmer-a’n India nena an inremna a taka kalpui thuai duh
Nilainia India tlawh tantu, British Prime Minister Keir Starmer-a chuan Indian nena sumdawnnaa inremna an siam tawh chu a rang thei ang bera kalpui a duh thu a sawi a. A zinna hian sumdawng, culture leh university-a mi thiam za rualin an zui.
Britain leh India hian July thlaa Indian Prime Minister Narendra Modi-a’n a tlawh tum khan free trade agreement siamin hei hi bungraw chi hrang hrang, textile atanga whisky leh car thlenga chhiah inlaksak tihtlemna tur niin sumdawnna kawng zau tak hawn belhna tur a ni bawk.
Sumdawnnaa inremna ziak tak hi kum thum inbiakna chawlhsan hnuah May khan tihfel a ni a, lehlam lehlam hian US President Donald Trump-a’n an ramin an bungrua an chawk luha chhiah sang a lak an tawrh lutuk loh ve ve nana ruahmanna an siam a ni.
Khawvela economy lian ber pangana leh parukna ramten an inkara sumdawnna huang an zauh hian kum 2040-ah chuan an inkara sum che hi $ tluklehdingawn 34 a tlintir theih beisei a ni.
Starmer-a’n Ningani nena India a tlawhnaa zuitute zingah hian tuialhtheia sumdawng lian, BP, engine siamtu Rolls-Royce, telecom firm BT leh company lian dang tam taka hotu rual an tel a. Britain-in EU a chhuahsan hnua ram dang sumdawnna inremna a siampui lian ber huang zauh zelna tur an dap dawn a ni.
Mumbai a thlena sumdawng hotu liante nen an inkawmnaah Starmer-a chuan, “Remchang tha tak tak min siamsak a ni,” a ti a, inremna an siam tawh chu a rang thei anga ‘mihringte hlawkpui tur a nih anga’ a taka kalpui thuai a duh thu a sawi bawk.
“Tunah hian remchang chu zau taka hawn a ni taah ka ngai a, kan hna chu he remchang inawng mek hi awlsam zawka banphaka siam a ni,” a ti.
Starmer-a hi Ningani khan Modi-a nen pawh an inkawm a. An pahnih hian inremna siamte sawi dunin nakum atanga hman tan tura tih hlawkpui zual zawk theih dan turte pawh an sawi dun a ni.