A thlawna sem loh leh DBT vangin sum lengvak a tlem – ZPM Thalai

A thlawna sem loh leh DBT
vangin sum lengvak a tlem
– ZPM Thalai
ZPM sawrkar hnu ah a thlawna sum sem a awm tak loh avang leh digital payment system hman uar a nih tawh bawk avangin sum lengvak a tlem angin a lang mai zawk tih ZPM Thalai chuan an sawi.
ZPM Thalai Hqrs. thuchhuak chuan, ZPM sawrkarna hnuaiah smuggling leh dan phal loh hmanga sumdawnna a tlem zel avangin MNF leh Congress sawrkar hunlai aiin khawtualah sum leng vak a tlem a; Bana Kaih Policy hmanga thlaithar leina pawh sumfai ni lo, direct benefit transfer hmanga bank account-a thun vek a nih avangin kum dang aiin thingtlang lamah pawh sum leng vak a tlem tih sawiin, opposition party-ten ZPM sawrkar hnuaiah sum leng vak a tlem, tia an beihna chu, sawrkar a kal dik vangah an ngai tih a sawi.
‘Sawrkar hmasaah khan dan phal loh hmanga sumdawnna a nasa in smuggler-te an huangtau hle a, police check gate leh out post helna kawng thar pawh an siam ngam hial. Hei vang hian Mizoramah smuggling hlawkpuitu an tam a, heng bungrua load leh unload-a inhlawh thinte pawh rate sang zawka an chhawr ngam avangin inhlawhfate kutah sum a lut tha a. Hei vang hian Mizoramah sum leng vak a tam a, smuggler-te hian an inthupna atan building, ram leh dawr man sang tak takin an lei chhawng thin a, smuggling ti ve lote tan inhmun lei ngam pawh a ni lo hial hman a ni,’ a ti.
ZPM a sawrkar hma khan MNF party chuan SEDP cheng nuai thum sem intiamin a sawrkar phah a, 2018- 2023 inkarah SEDP atan MNF sawrkar khan cheng vaibelchhe 1193.75 a hmangral tih thuchhuah hian a sawi. Congress pawhin NLUP cheng nuai khat sem a intiam avangin 2008 -2018 inkara an sawrkar chhungin NLUP atan cheng vbch. 2896.91 a hmangral tih a sawi bawk.
Heng avang hian Mizoramah a thlawna sumfai dawng an tam a, khawtualah sum leng vak a tam phah tih sawiin, ‘ZPM party erawh hetianga Mizoram budget sum semral dotu a nih avangin, sawrkarna a chan phat atang khan MNF-in SEDP sum a sem bang vbch. 110 chu kuthnathawktute thlai thar leisakna atan a dah hrang nghal a, dik taka thawkrimte kutah chiah Mizoram budget sum hi hman a nih tawh avangin, sawrkar hmasate hunlai ai chuan ZPM sawrkar hnuaiah sum leng vak a tlem ta a ni,’ a ti.
Sawrkar laipuiin Digital India a kalpui avangin sumfai hmang thin kan tlahniam ta hle tih sawi bawkin, kawngsira hawkers leh chawhmeh zuarte chenin digital payment system kan hmang vek tawh a. Dawr leh bazar kalna atan hun tam tak kan sen thinna pawh tlahniam zelin, online marketing leh home delivery policy kan uar chho zel a, heng sumdawnnaah hian online banking kan hman nasat avangin sumfai hmanna a tlahniam hle tih a sawi a ni.