Palestinian-ten an khaw lam an pan, chhun laiah mi hren chhuah tan beisei

Palestinian-ten an khaw lam an pan, chhun laiah mi hren chhuah tan beisei
Israel leh Palestinian hel pawl, Hamas inkara inkahhai puan mek karah Palestinian sang tel chuan Gaza vaukam hrulah hmar lam panin ke, car leh tawlailir hmangin an in kalsan leh chhe tawh panin an haw mek zel.
“Sawi fiah ngaihna a awm lo, Pathian chu fakin awm rawh se,” tiin ke a fanu nena haw mek, a lua hliam tuar, Nabila Basal-i chuan a sawi a. “Indo a tawp leh kan hrehawm tawh a tawp ta hi kan lawm tak zet a ni,” a ti.
Kar liam taa US ruahman anga inremna kalpui mekah hian mi sang tel thihna leh thil tam tak chhiah an hnutchhiah hnuah Israeli sipaite chu an inhnukdawk mek.
US President Donald Trump-a chuan Thawhtanni hian ram hruaitu 20 rualte nen Egypt-ah intawh khawma muanna tluantling a awm theihna tura sawihonaah an tel danw tih Egyptian President Abdel Fattah el-Sisi-a thupuangtu chuan a sawi a. Red Sea kama Sharm el-Sheikh-ah hun hman a ni ang.
Hamas pawhin inkahhai inremnaa tar lan a nih angin Thawhtanni chhun lai atangin Israeli an hrente an chhuah tan ang.
Gazan tam tak chuan an awmna thin, indona avanga an rauhsan leh an in chhe vek tawh lam panin an kir mek a. “Ka in hi kum 40 kal taa kan sak a ni a, hun rei lo te chhungin a chhe vek a ni,” tiin Gaza City-a a in chhe vek kawta ding, Ahmed al-Jabari chuan a sawi a. “Thisen luang lo leh thisen chhuak lova ka awm hi ka lawm a; mahse, khawiah nge ka kal tak ang? Kum 20 chhung puan inah kan khawsa dawn em ni?” a ti.
Israel-ah chuan Tel Aviv-a Hostages Square an tihah kum hnih chhung thinrim leh rilru hrehawm taka an awm a tawp ta lawmin mi sang tel an pungkhawm.
Inkahhai a awm theih nana thawktu tangkai – Trump-a fanu, Ivanka Trump leh a pasal, Jared Kushner bakah US Middle East envoy Steve Witkoff te pawh dawhsanah an inlan a. Mi thenkhat chuan, “Kan lawm e, Trump, kan lawm e Witkoff,” tiin an au va, Witkoff-a’n Israeli Prime Minister Benjamin Netanyahu-a hming a lam chhuah erawh chuan an au el thung.
Israeli sipaite hi Zirtawpniah insaseng fel vek tura tih an ni a, khawpui liante an chhuahsan vek ang a, Gaza zahve aia zau mah erawh an la thunun dawn a. Inremna ziah atanga darkar 72 hnu, Thawhtanni chhun lai atangin mi hrente chhuah tan a ni dawn thung.
Hamas hian Israeli 48 an la hreng a, an zinga 20 hi la dam nia hriat an ni a, pahnih erawh an chin hriat a ni rih lo.
Mi hrente chhuah an nih rual hian Israel pawhin indo chhunga Palestinian an man mi 2,000 dawn an chhuah ve thung ang a. Ni tin Gaza-ah ei tur leh damdaiw phur truck tam tak a lut bawk ang.
Israel leh Hamas inremna tur hian Trump-a chuan rawtna 20 a nei a, hmabak tam tak a la awm a, thenkhat chu pawm a la ni lo.
Heng zingah hian Gaza Strip-a rorel zuitu tur leh Hamas kal zel dan tur pawh a tel a, Israel-in an ralthuam an dah ngei an phut laiin anni hian an duh lo thung.
Israeli leh Palestinian-te chu kum hnih chhung indona, Palestinian 67,000 thih phahna thleng a tawp dawn tih puan a nih atangin an hlim hle a. Indona hi Hamas-in October 7, 2023-a Israel beia mi 1,200 vel an thah leh hren tura mi 251 an hruai atanga intan kha a ni.