Delhi-a Afghan foreign minister hun hmanaa hmeichhe tel phal lohvin sawi a hlawh

Delhi-a Afghan foreign minister hun hmanaa hmeichhe tel phal lohvin sawi a hlawh
Indian politician leh chanchinbu mi tam tak chuan Afghan Taliban foreign minister-in Delhi-a thuthar lakhawmtute nen hun an hmannaa hmeichhe chanchinbu mite an tel ve phal a ni lo chu nasa takin an sawisel.
Zirtawpnia Foreign Minister Amir Khan Muttaqi-a’n Afghan embassy-a thuthar lakhawmtuten an kawmnaah hian mipa chanchinbu mi 16 chauh tel phalna pek an ni a. Chanchinbu mite chuan hmeichhia leh ram dang chanchanchinbute chu luhtir phal an ni lo tih an sawi.
Indian Ministry of External Affairs (MEA) chuan Afghan embassy-a ‘chanchinbu mite nena inkawmnaah hian an inrawlh lo’ tih an sawi.
Taliban sorkar chuan hmeichhiate tel ve turin sawm an ni lo tih an sawi.
BBC hnenah ‘hmeichhe chanchinbu mite hi indawrna a mumal loh avangin telh loh an ni a, Delhi-ah hetiang hun hi a awm leh a nih chuan sawm an ni tawh ang’ tih a sawi.
Eptu hruaitu, Rahul Gandhi-a chuan hetiang ni tur tih hre saa thil tihtir a ni chu sorkar a sawisel a Prime Minister Narendra Modi-a chuan ‘India-a hmeichhiate hnenah an tana ding turin a chak tawk lo’ tih a hrilh niin a sawi.
Editors Guild of India chuan hmeichhiate telh an ni lo chu demin, “MEA nena inrawn tlanga tih a ni emaw, ni lo emaw, hetianga tel phal loh chin neia thil kalpui a ni hi a tha lo hle a ni,” an ti.
Indian sorkar chuanb ‘India-a palaina thila chanchinbu mite intluktlanna hi a takin a kaltlangpui ngei tur a ni’ tih an sawi.
Muttaqi-a hi India-ah chawlhkar khat a cham dawn a. Zirtawpni khan Foreign Minister S Jaishankar-a hmuin India-in Kabul-ah embassy a hawng leh dawn tih a puang a, Taliban-in rorelna an chan leh hnua anb khar tawh kha a ni.
Kum 2021 atang khan Taliban sorkar hian Islamic Sharia dan tlawhchhanin khuahkhirhna khauh tak tak a kalpui a, a bikin Afghan hmeichhia leh hmeichhe naupangte an rap bet nasa hle.
Mipa chauh tel theihna siam chungchangah hian Gandhi-a chuan, “Kan ramah hian hmeichhiate hi eng hmunah pawh an tel ve theihna tur dikna chanvo an nei a ni,” tiin social media-ah a tar lang.
Indian politician Priyanka Gandhi Vadra-i pawhin Modi-a’n ‘hmeichhia tel phal loh’ an nih chungchang hi sawi fiah ngei a phut.
A hmunah pawh hian mipa thenkhat chuan an thawhpui hmeichhiate lam an tang tih lantir nan an chhuak bawk.