Inremna angin Hamas-ten mi hren an chhuah tan ta

Inremna angin Hamas-ten mi hren an chhuah tan ta
US President Donald Trump-a’n Gaza-a indona titawp tura hma a lakna zara inkahhai kalpui mek zelah Thawhtanni khan Palestinian hel pawl, Hamas chuan Israeli an hren la dam zinga mi pasarihte chu an chhuah ta tih hmalaknaa tel pakhatin a sawi.
Iran, Yemen leh Lebanon kang kai hial kum hnih indona titawp tura inkahhai puanah hian mi hren chhuah leh Israel-in Palestinian lung in tang an kawl tam tak chhuah an ni dawn.
Mi hren pasarih chhuahte hi International Committee of the Red Cross kutah Gaza-a Hamas sipaiten an hlan tih thuneitu pakhatin a sawi.
La dam dang 13 an la awm a, mi dang 28 an la kawl bawk a, an zinga 26 hi an thi tawh nia ngaih niin pahnih chin erawh hriat a ni chiah lo va. Hengte pawh hi hlan let vek an ni ang.
Inremna ang chuan Israel hian Palestinian lung in tang 2,000 dawn a chhuah ve dawn bawk a, hei hi Thawhtanni veka tih tan ve tur a ni a, he chanchin ziah lai hian an la chhuah ve lo deuh.
Israel-in a chhuah tur mi 1,966-te hi tan in atangin bus-a phurh chhuah niin Gaza-a Nasser Hospital-a chhuah tur nia sawi a ni.
Hamas sipai ni ngeia ngaih hmai tuam, a dum veka inthuamte chu Gaza chhim lama Nasser Hospital-ah hian an thleng tawh nghe nghe.
Israel-ah chuan Gaza bul lawk, Reim bula sipai camp-ah mipui inhawr khawmin Israeli flag an keng hlawm a, he hmunah hian mi hren chhuahte hi thlenpui an ni a, damdawi inah hruai nghal an ni.
Tel Aviv-a Hostages Square-ah pawh mi pungkhawmin hlim takin Israeli flag an vai a, mi hrente thlalak an lek chhuak bawk.
Washington atanga Israel pana Air Force One-a Pathiannia a chuan laiin Trump-a chuan, “Indo a tawp ta,” tiin thuthar lakhawmtute a hrilh a. Gaza leh Israel boruak awm zel dan tur zawhna pawh, “Pangngai takin a awm dawn niin ka ngai,” a ti.
Trump-a hi Thawhtanni zanah Israel ram rorelna inah thu sawi tura tih a ni a, he ramah hian indo a tihtawp avangin pasaltha hmuaha hmuah a ni a. Israel-a civil mite hnena chawimawina sang ber chu kum tawpah Israeli President Isaac Herzog-a’n hlan a ni dawn tih a sawi bawk.
Hamas chuan Thawhtannia thu an chhuahah an pawl chuan inremna an siam ang leh hun bi tiam angin thil an ti tih an sawi a, Israel pawh ti ve ngei turin an duh tih an sawi a. Israel chuan sipai chakna hmanga mi hrente chhan chhuah an tumna a hlawhchham hnuah inkahhai leh mi tang inthlang an pawm ve ta mai niin an sawi bawk.
Tar lan tawh thin angin Gaza-a indona hi Hamas-in October 7, 2023-a Israel luhchilha mi 1,200 vel an thah leh hren tura mi 251 an hruai atanga intan a ni a. Israeli sipaite chuan bei zuiin Gaza pum chu an tichhe deuh vek a, Palestinian 67,000 chuang an thi.
Indona a tawp zui zel theih dan tur sawiho turin Thawhtanni zan khan khawvel ram hruaitu hrang hrangte chu Trump-a hovin Egypt-a Sharm el-Sheikh-ah an intawk khawm zui.
Trump-a’n point 20 rawtna a neihte pawm vek a la ni lo va, heng zingah hian Gaza Strip-a thuneihna chang zui tur te, Israel-in Hamas-te ralthuam tung vek tura a phuna te pawh a tel.